Քիչ առաջ «Արամ Խաչատրյան» համերգասրահում ավարտվեց Հայաստանի ֆուտբոլի ֆեդերացիայի կազմակերպած 2010 թվականի մրցանակաբաշխությունը։
Սկզբում պարգևատրվեցին Հայաստանի ֆուտզալի չեմպիոն, Հրազդանի «Քախսի»-ի և Առաջին խմբի հաղթող Երևանի «Արարատ»-ի ֆուտբոլիստները։ Դրան հաջորդեց Հայաստանի Բարձրագույն խմբի 2010 թվականի մրցանակակիրների մրցանակաբաշխությունը: ՀՖՖ գործկոմի անդամներն ու նախագահ Ռուբեն Հայրապետյանը մեդալներ ու պատվոգրեր հանձնեցին «Ուլիս»-ի, «Բանանց»-ի և «Փյունիկ»-ի ֆուտբոլիստներին:
Տարվա լավագույն ֆուտբոլիստ ճանաչվեց Հայաստանի ազգային հավաքականի ու «Փյունիկ»-ի հենակետային կիսապաշտպան Կառլեն Մկրտչյանը։ Լավագույն մարզիչ ճանաչվեց Հայաստանի հավաքականի և «Փյունիկի» գլխավոր մարզիչ Վարդան Մինասյանը։ Լավագույն խոստումնալից ֆուտբոլիստ հռչակվեց «Բանանց»-ի ֆուտբոլիստ Վալտեր Պողոսյանը, ով արժանացավ նաև «Ֆուտբոլ+» շաբաթաթերթի սահմանած «Տարվա հայտնություն» մրցանակին: Panarmenian.net-ի` հայկական ֆուտբոլում ամենամեծ ներդրումն ունենալու համար նախատեսված մրցանակին արժանացավ Վարդան Մինասյանը: FAF-ը հատուկ մրցանակ հանձնեց Հայաստանի հավաքականի հարձակվող Յուրա Մովսիսյանին:
Լուսանկարը` PanArmenianPhoto-ի: