Գալուստ Սահակյանը «Լեզվի մասին» օրենքի, ուղեղի տրանսպլատացիայի և ռոբոտների մասին

«Լեզվի մասին» օրենքի ընդունման դեմ կազմակերպված բողոքի ակցիաները ԱԺ ՀՀԿ խմբակցության ղեկավար Գալուստ Սահակյանը դրական է գնահատում, քանզի, ըստ նրա` մեր ազգը և քաղաքական դաշտը հարթ գլուխների վայր չէ, և յուրաքանչյուրն իր տեսակետն ունի. «Բայց այդ ամենի համար պատասխանատվությունը դրված է մեզ վրա, և որևէ վտանգ չի կարող պատահել: Այսօր 25 հազարից ավելի հայազգի երեխաներ սովորում են արտասահմանում` օտար լեզվով դպրոցներում, նրանք խոսում, գրում, շփվում են օտար լեզվով: Հայաստանում նման բան չի կարող լինել` խնդիրն այստեղ լեզվամտածողությունն է: Պատերազմը գնում է լեզվամտածողության ուղղությամբ: Պետք չէ մտածել, թե մեր ազգը ռոբոտներ են, և ինչ-որ մարդիկ պիտի գտնվեն, նրանց ուղեղը հանեն և այլ ուղեղ դնեն` այս օրենքը նման վտանգներ չունի»:
Սահակյանի խոսքերով, օտարալեզու դպրոցներ բացողները առաջնորդվում են իրենց հոբբիով և բիզնես նպատակներ չեն հետապնդում: Սահակյանը նշեց, որ ինքը հարկ չի համարում արձագանքել «Լեզվի մասին» օրենքի շուրջ բարձրացած «վայնասուններին», քանզի դա կեղծ հայրենասիրություն է: