Դեկտեմբերի 17-ին դեսպան Ռուբեն Կարապետյանը հանդիպել է Պավիայի քաղաքապետ Ալեսսանդրո Կատտանեոյի /Alessandro Cattaneo/ հետ: Հանդիպման սկզբում դեսպանը ողջունել է Պավիայի և Գյումրիի միջև համագործակցության հաստատելու նախաձեռնությունը` ընդգծելով, որ համագործակցության խթանումը Իտալիայի և Հայաստանի նահանգների ու քաղաքների միջև հանդիսանում է դեսպանության առաջնային խնդիրներից մեկը: Հանդիպման ընթացքում քննարկվել են Պավիա և Գյումրի քաղաքների միջև համագործակցության խորացմանը, Եվրոպայի ամենահին` Պավիայի համալսարանում հայ ուսանողների ուսման, ինչպես նաև տեղեկատվական տեխնոլոգիաների, բժշկության, փոքր ու միջին բիզնեսի ոլորտներում հայ և իտալացի գործարարների համագործակցության հնարավորություններին վերաբերող մի շարք հարցեր: Պայմանավորվածություն է ձեռք բերվել Պավիայի և Հայաստանի բժշկական համալսարանների միջև համաձայնագրի ստորագրման, Պավիայում բարձր տեխնոլոգիաների հիման վրա նորաստեղծ ուռուցքաբանական կենտրոնի հետ կապերի հաստատման, ինչպես նաև 2011թ. Պավիայում հայ-իտալական գործարար համաժողով կազմակերպելու վերաբերյալ:
Նույն օրը երեկոյանՊավիայի քաղաքապետարանի պատմական Բրոլետտո շենքում տեղի է ունեցել «Հայաստանի օր» միջոցառումը: Ներկաներին ողջույնի խոսքով դիմել են Իտալիայի ԱԳՆ տեղակալ, սենատոր Ա. Մանտիկան, Պավիայի քաղաքապետ Ա.Կատտանեոն ու դեսպան Ռ. Կարապետյանը: Իր ելույթում Ա. Մանտիկան նշել է, որ Հայաստանը «Իտալիայի մտերիմ և պատմական բարեկամն է» և «Իտալիան շահագրգռված է Հայաստանի հետ խորացնելու իր համագործակցությունը»: Անդրադարձ է կատարվել հայ ժողովրդի հարուստ մշակութային անցյալին ու ներկա դժվարություններին, այդ թվում` ԼՂ հիմնախնդրի կարգավորմանը:
Այնուհետև Նադիա Պասկաուալը ներկայացրել է վերջերս զբոսաշրջիկային հայտնի «Polaris» իտալերեն ուղեցույցների շարքում հրատարակված «Հայաստան և Լեռնային Ղարաբաղ» իր հեղինակած գիրքը:
Երեկոն եզրափակել են հայկական մշակույթի և պատմության վերաբերյալ Միլանում ՀՀ պատվավոր հյուպատոս Պ. Քուչուկյանի զեկուցումն ու Ֆ. Չեթինի «Իմ տատիկս` Հրանուշը» գրքի թատերական ներկայացումը: