Գլենդելում ապրող 51-ամյա հայ տղամարդը երեքշաբթի օրը ձերբակալվել է սպանության փորձի մեղադրանքով, և այսօր պետք է ներկայանա դատարանին: Ոստիկանությունը հաղորդում է, որ տղամարդը փորձել է հանել 82-ամյա տղամարդու աչքերը՝ առանց որևէ ակնհայտ պատճառի:
Ոստիկանությունից հայտնում են , որ Բենիամին Ենգիբարյանը ձերբակալվել է երեքշաբթի օրը առավոտյան Central պողոտայի և Windsor փողոցի մոտ այն բանից հետո, երբ ականատեսները լսել են, թե ինչպես է նա սպառնում սպանել վիրավոր տղամարդուն` հարվածներ տեղալով և փորձելով հանել նրա աչքերը:
Glendale News Press-ը հաղորդում է, որ վիրավոր տղամարդուն, որն արնահոսել է երկու աչքից, տարել են Glendale Memorial հիվանդանոց, որտեղ բուժել են նրա վիրավորված աջ աչքը, ձախ ծունկը, աջ այտի կտրվածքը: Ոստիկանությունը հայտնում է, որ տղամարդու անունը չի հաղորդվի նրան պաշտպանելու նպատակով:
Զոհը ոստիկանությանը հայտնել է, որ փորձել է պաշտպանել ինքն իրեն, բայց ընկել է գետնին, իսկ Ենգիբարյանը շարունակել է բռնություն գործադրել:
Ականատեսները հայտնում են, որ տեսել են, թե ինչպես է Ենգիբարյանը փորձել վնասել զոհի աչքերը` միևնույն ժամանակ նրան հարվածելով:
Ոստիկանական քննիչները չորեքշաբթի օրը փորձել են պարզել, թե որն է նման բռնություն կատարելու՝ Ենգիբարյանի պատճառաբանությունը:
