Գալիք ընտրություններին քաղաքական ուժերի մասնակցությունն ու ակտիվությունն անհրաժեշտություն է. «Առաջին լրատվական»-ի հետ զրույցում, մեկնաբանելով այն ուժերի ուժերի կոչը, թե չպետք է մասնակցել գալիք խորհրդարանական ընտրություններին, նշեց «Ազատ դեմոկրատներ» կուսակցության նախագահ Խաչատուր Քոքոբելյանը:
Նա կարծում է, որ ընտրությունները ցանկացած քաղաքական ուժի, հատկապես՝ ընդդիմադիր, հնարավորություն է տալիս իր մոտեցումները, գաղափարները տարածելու և ավելի ակտիվ լինելու: Ըստ նրա` ընտրությունները նաև հնարավորություն են ընձեռում հասարակությանը, նման մոտեցումներ ունեցող քաղաքացիներին և քաղաքական ուժերին ավելի համախմբելու և միասնական հանդես գալու:
«Այդ հնարավորությունը չօգտագործելը, ենթադրում եմ, սխալ է: Կարծում եմ՝ դա լավագույն հնարավորությունն է թե՛ համախմբման, թե՛ ակտիվության համար: Ես կարծում եմ, որ ընտրություններին ակտիվությունը և մասնակցությունը խիստ անհրաժեշտություն է»,- նշեց Խ. Քոքոբելյանը` ընդգծելով, որ որևէ մեկի կողմից լուրջ հիմնավորում չի լսել, թե ինչու չպետք է մասնակցվել գալիք ընտրություններին:
Նրա համոզմամբ` եթե մարդը ցանկանում է ժողովրդավարական երկիր կառուցել, ընտրությունները դեր ունեն, իսկ հակառակը պարզապես հեղափոխությունն է:
Անդրադառնալով գալիք ընտրությունների արդարությանը` Քոքոբելյանն ասաց, որ Հայաստանում շատ քիչ քաղաքական գործիչներ կան, որ հավատում են Հայաստանում հնարավոր արդար ընտրությունների անցկացմանը: «Դա հիմք չի կարող հանդիսանալ, որպեսզի մարդը հիասթափվի` ընտրություններին չմասնակցի և չփորձի ամեն ինչ անել իր քվեն պաշտպանելու համար»,- ամփոփեց «Ազատ դեմոկրատներ» կուսակցության նախագահ Խաչատուր Քոքոբելյանը:
