Լոնդոնի երկու բնակիչ, ովքեր մեղավոր են ճանաչվել 1993 թվականին ռասիզմի հողի վրա սևամորթ պատանու սպանության մեջ, դատապարտվել են ցմահ բանտարկության:
Ինչպես հայտնում է BBC-ն, նախօրեին ատենակալները 36-ամյա Հարի Դոբսոնին և 35-ամյա Դևիդ Նորիսին մեղավոր են ճանաչել սպանության մեջ:
Դոբսոնը բանտում անցկացնելու է 15 տարի և երկու ամսից ոչ պակաս, իսկ Նորիսը` 14 տարի և երեք ամսից ոչ պակաս: Նրանց դատապարտել են որպես անչափահասների, քանի որ 1993 թվականին նրանք դեռ 18 տարեկան չկային:
1993 թվականին 18-ամյա սևամորթ Սթիվեն Լոուրենսին կտրտել էին ավտոբուսի կանգառում:
Սկզբնական շրջանում սևամորթ պատանու սպանության հետաքննությունը արդյունք չէր տալիս, որի պատճառով Լոնդոնի ոստիկանությանը հանրությունը մեղադրում էր ինստիտուցիոնալ ռասիզմի մեջ:
Այդ ժամանակ ոստիկանությունը հայտնել էր հինգ կասկածյալների մասին, այդ թվում` նաև Դոբսոնի և Նորիսի, սակայն նրանցից ոչ մեկը չի դատապարտվել, քանի որ ոստիկանությունը շատ սխալներ էր թույլ տվել:
Չորս տարվա ընթացքում գործը վերանայվել է: Այս ժամանակահատվածում քննիչները Դոբսոնի վերարկուի վրա հայտնաբերել էին արյան փոքր հետք, որը կարող էր պատկանել միայն Լոուրենսին, իսկ Նորիսի ջինսի վրա` սպանված պատանու մազերը:
Այս հանցանշանները հայտնաբերվել էին հագուստների վրա, որոնք 1993 թվականին ոստիկանությունը վերցրել էր մեղադրյալներից:
Դոբսոնը և Նորիսը իրենց մեղավոր չեն ճանաչում: Նրանք հայտարարում են, որ ոստիկանությունը կրկին սխալ է թույլ տալիս, և այդ հանցանշանները պատահաբար են հայտնվել իրենց հագուստների վրա, քանի որ գործի բոլոր նյութերը պահվում էին մեկ վայրում և ժամանակի ընթացքում խառնվել են: