Կեսարյան հատումները Հայաստանում բարձրացման միտում ունեն: Թեպետ, ի տարբերություն եվրոպական մի շարք երկրների, դրանք մեր երկրում կատարվում են միայն բժշկի ցուցումով, երբ մոր կամ պտղի կյանքին վտանգ է սպառնում: ՀՀ ազգային վիճակագրության տվյալների համաձայն` Հայաստանում 2004թ. գրանցվել է 3611 կեսարյան հատման դեպք , 2005թ` 4248, 2006թ` 4512, 2007թ` 5638, 2008թ` 6234, 2009թ` 7882: ՀՀ առողջապահության նախարարության աշխատակազմի բժշկական օգնության կազմակերպման վարչության մոր եւ մանկան առողջության պահպանման բաժնի գլխավոր մասնագետ, բ.գ.դ դոցենտ Գայանե Ավագյանի խոսքերով, կեսարյան հատումները ամբողջ աշխարհում բարձրացման միտում ունեն: Ավելին, կան երկրներ, որտեղ հիմնականում ծննդալուծումը կատարվում է կեսարյան հատումների միջոցով: Օրինակ, ԱՄՆ-ում կեսարյան հատումները կազմում են 28 տոկոս: Այսինքն` 100 կնոջից 28-ը կեսարյան հատման միջոցով են ավարտում ծննդալուծումը: Իտալիայում կեսարյան հատումները կազմում են 35 տոկոս, Ռուսաստանի Դաշնությունում` մինչեւ 24 տոկոս, Մեքսիկայում` 50 տոկոս, իսկ Բրազիլիայում` 90 տոկոս: Այդ երկրներում օրենքը թույլատրում է կանանց իրենց ցանկությամբ կեսարյան հատումների դիմել, եւ դա է գլխավոր պատճառներից մեկը, որ վերը նշված երկրներում այդքան բարձր է կեսարյան հատումների քանակը: Իսկ Հայաստանում մինչեւ 2005 թ. ունեցել ենք առնվազն 11 տոկոս կեսարյան հատման ցուցանիշ, 2009թ.` 15, իսկ 2010-ին` 18 տոկոս կեսարյան հատումների հաճախականություն: «Ինչպես նկատում եք` տարեց տարի մեծանում է կեսարյան հատումների թիվը: Սակայն մենք դա անում ենք սովորաբար պտղի եւ մոր շահերից ելնելով: Այդ պատճառով նորածնային մահածությունը նվազել է: Կեսարյան հատումների միջոցով այսօր արդեն հասել ենք նրան, որ 100 նորածնից 2 են մահանում: Բայց կրկնում եմ, որ կեսարյան հատումները մեր երկրում միայն կատարվում են բժշկական ցուցումների դեպքում»,- պարզաբանեց Գայանե Ավագյանը: