Հայաստանի գլխավոր մարքսիստ Դավիթ Հակոբյանը մամուլի ասուլիսի ժամանակ հայտարարեց, որ պառլամենտը դարձել է կառավարության անօրինական գործողությունների օրինականացման հլու-հնազանդ հարճ: Դավիթ Հակոբյանի կարծիքով, արտաքին քաղաքականությունը տանուլ է տրված, իսկ հայ-թուրքական հարաբերությունները «ֆիասկո» են ապրել, քանի որ դիվանագիտական խաբկանք էին: Ինչ վերաբերում է Սերժ Սարգսյանի իրականացրած կադրային քաղաքականությանը, ապա Դավիթ Հակոբյանը դրանք համարում է կոսմետիկ բնույթի և կարծում է, որ այդ ամենն իշխանական բուրգը իրականացնում է իրեն վերարտադրելու համար: «Այսօր իշխանական բուրգը մրցակցության մեջ է արցախյան վիկինգների առաջին էշելոնի հետ»,- ասաց Դավիթ Հակոբյանը: Ռոբերտ Քոչարյանի հանդիպումը ՌԴ վարչապետ Վլադիմիր Պուտինի հետ Դավիթ Հակոբյանը կապում է Ռոբերտ Քոչարյանի` ռևանշի ձգտումների հետ: Նրա կարծիքով` առկա է մրցակցություն վիկինգների առաջին և երկրորդ էշելոնների միջև, և կադրային փոփոխություններով էլ Սերժ Սարգսյանը փորձում է իր նվիրյալների շքախումբը ձևավորել: «Առաջին լրատվական»-ը Դավիթ Հակոբյանից հետաքրքրվեց, թե կհաջողվի՞ Սերժ Սարգսյանին կադրային փոփոխություններով լեգիտիմացնել սեփական իշխանությունը: «Եթե կարծում եք, թե Թովմասյան Հրայրը, որը «Երևանի մասին» օրենքի հեղինակն է, վարկաբեկված չէ, սխալվում եք: «Երևանի մասին» գրել ավելի տգետ օրենք, հնարավոր չէ պատկերացնել: Երկրորդը` արդարադատության նախարարին հեռացնելը կապված էր ամերիկյան իրադարձությունների հետ, որ նա չկարողացավ պատշաճ արդարացնել իշխանություններին ՀՖԲ-ի մոտ, և ոչ թե Հարկադիր կատարման վարչության պետին չպատժելու հետ»,- ասաց Դավիթ Հակոբյանը` հավելելով, որ կադրային փոխատեղումները որևէ կապ չունեն նոր տնտեսական քաղաքականության հետ: Դավիթ Հակոբյանը նշեց, որ Սերժ Սարգսյանը պետք է ձևավորի տնտեսագիտական և դիվանագիտական ուղեղների նոր շքախումբ, սակայն դրան չի հավատում: «Առաջին լրատվական»-ը հետաքրքրվեց նաև, թե որքանո՞վ է հնարավոր Ռոբերտ Քոչարյանի վերադարձը քաղաքականություն այն դեպքում, երբ նրա գործը գտնվում է Հաագայի միջազգային քրեական դատարանում: «Որքան էլ Ռոբին Հուդը ակտիվացնի անցուդարձը Պուտինի մոտ, նա, կարծում եմ, խփված խաղաքարտ է»,- մեր հարցին այսպես արձագանքեց Հայաստանի մարքսիստական կուսակցության նախագահը:
