Ա.Ապատյան. «Օրինագիծը հակասում է ՀՀ Սահմանադրությանը»

Երեկ ԱԺ-ն երկրորդ ընթերցմամբ ընդունեց Օտարալեզու դպրոցների վերաբացման մասին օրինագիծը: Թեպետ հեռուստատեսությունը լռում է այս մասին, «Մենք դեմ ենք օտարալեզու դպրոցների վերաբացմանը» խումբը շարունակում է ակտիվ պայքարը հակաօրինական նախագծի դեմ: Այսօր թեմայի շուրջ բանավեճի էին հրավիրված խմբի անդամ Արամ Ապատյանը և տեղեկատվական անվտանգության մասնագետ, օտարալեզու դպրոցների մոլի կողմնակից Տիգրան Քոչարյանը` Փիղ մականունով: «Օրինագիծը հակասում է ՀՀ Սահմանադրությանը և ՀՀ ստորագրած մի շարք միջազգային պայմանագրերին»,- նկատում է Ա. Ապատյանը: Այնուամենայնիվ, Տ. Քոչարյանը անհանգստաալու ոչ մի առիթ չի տեսնում. «Ինձ զարմացնում է նման աժիոտաժը»,- ասում է նա: Ա. Ապատյանը համոզված է՝ օրինագիծը վտանգավոր է հայերենի համար, քանի որ ստեղծում է օտարալեզու վերնախավ և նվազեցնում հայերենի վարկանիշը. «Այն երկրները, որոնք զիջում են լեզուն, հետզհետե զիջում են նաև անկախությունը»,- ասաց բանախոսը: Բանախոսը վկայակոչում է միջազգային փորձը` մատնանշելով Լիբանանի օրինակը, որտեղ կրթությունը անգլերենով ու ֆրանսերենով է, իսկ արաբերենը համարվում է ստորին խավի լեզու: «Որակյալ կրթություն ասելով՝ չպետք է հասկանալ օտարալեզու ուսուցում: Հարավային Կորեայի պես զարգացած երկրում, որի կրթությունը երրորդ տեղն է գրավում աշխարհում, օրենքը օտարալեզու կրթություն թույլատրում է միայն օտարազգիներին և արտասահմանում առնվազն 3 տարի ապրած մարդկանց»: «Մենք դեմ ենք օտարալեզու դպրոցների վերաբացմանը» խումբը այժմ պատրաստում է հայց, որտեղ կետ առ կետ կնշվեն բոլոր օրինախախտումները: