«Սերժ Սարգսյանի վերջին ելույթները ինձ ստիպում են մտածել, որ նախագահը սկսել է ավելի շատ հասկանալ տնտեսությունից, քան թե վարչապետը, որովհետև վիճակը այդ աստիճանի խայտառակ է»,- այսօր լրագրողների հետ հանդիպմանը նման տեսակետ հայտնեց նախկին վարչապետ Հրանտ Բագրատյանը: «Իսկ կառավարությունը, չգիտեմ, կառավարության շենքում ինչ-որ մատուռներ են բացում, աղոթք են անում: Վարչապետը ինչ-որ տերտերների հետ է հայտնվում էկրանին, անհասկանալի բաներ են կատարվում, սրանք շատ լուրջ բաներ են: Էս էր պակաս, այ մարդ, արդեն կրոնն ու կառավարությունը լրիվ խառնվել են»,- ասաց Հ. Բագրատյանը: Ըստ նրա՝ սովորաբար համարվում է, որ իսլամական պետության մեջ հնարավոր չէ կրոնը անջատել պետությունից: «Հիմա սրանք (կառավարությունը) բան չեն կարողանում անել, կպել են եկեղեցուն՝ ամենուրեք ներգրավելով: Իբր էդ եկեղեցին էական դրական դեր է խաղացել մեր պատմության մեջ»,- ասաց Բագրատյանը: Հարցին, թե արդյոք ինքը աթեի՞ստ է, նախկին վարչապետը պատասխանեց. «Ո՛չ, կատաղի հակառակորդն եմ Հայ առաքելական եկեղեցու՝ համարելով, որ հայոց պետականության կորուստները տեղի են ունեցել հիմնականում այդ եկեղեցու պատճառով»: «Ոնց կարող է սա եկեղեցի լինի, եթե չի պատկանում որևէ քրիստոնեական ճամբարի: Հայը 1500 տարի է՝ չի փոխվում: Նա պետք է փոխվի: Անպատժելի մի կառույց է սա` Քրիստոսի ու հավատի հետ, իմ կարծիքով, կապ չունեցող: Եթե եկեղեցին կրթությամբ է զբաղվում, առողջապահությամբ, այդ եկեղեցին պետության կարիք չունի: 3-4 անգամ հայոց պետականության կործանման նախաձեռնությունը պատկանել է Հայ առաքելական եկեղեցուն: Ինչպես 428 թվին, այնպես էլ 1045 թվին: Ընդհակառակը, Հայ առաքելական եկեղեցու հավատավորն եմ, և համարում եմ, որ այն զգալիորեն, լրջորեն պետք է բարեփոխվի: Եվ չեմ կարծում, որ տերտերների` ոչինչ չփոխելու կամայականությունը պետք է գերակայի»,- ասաց Բագրատյանը` հավելելով, որ ողջ աշխարհում քրիստոնեական եկեղեցիները հրապարակում են իրենց եկամուտների ու ծախսերի հաշվետվությունը: «Մի անգամ տեսե՞լ եք Հայ առաքելական եկեղեցու եկամուտների ու ծախսերի հաշվեկշիռը մամուլում տպված: Որտեղի՞ց այդ փողերը: Ո՞վ է սահմանում մոմի գինը: Սա կոչվում է ստվերային տնտեսություն: Եղել են տարիներ, երբ Հայ առաքելական եկեղեցում եղել են լուսավորյալներ, որոշակի առաջադեմներ, բայց հիմնականում` ռեակցիոն: Պատահական չէ, որ ամեն մի թուրքական սուլթան կամ պարսկական շահ որ նստում էր գահին, առաջին հերթին հայ կաթողիկոսներին մի քանի հատ հերոսի կոչում էր տալիս: Այս մասին մենք չենք սիրում խոսել: Հիմա իբր սա մի պրոգրեսիվ կառույց է, հետն էլ՝ մտել է կառավարություն»,- նշեց ՀՀ նախկին վարչապետը: