Դեկտեմբերի 22-ին Երևանի քաղաքապետ Կարեն Կարապետյանն ընդունեց «Վեոլիա ջուր» ընկերության միջազգային առաքելությունների պատասխանատու, մայր գրասենյակի խորհրդի անդամ Պիեռ Բրյունեին և «Երևան ջուր» ընկերության գլխավոր տնօրեն Պասկալ Ռուայեին: Հանդիպման նպատակը «Վեոլիա» և «Երևան Ջուր» ընկերությունների վարձակալության պայմանագրի շրջանակներում որոշակի գործառույթների, ինչպես նաև ջրամատակարարման և ջրահեռացման ծառայություններին առնչվող հարցերի քննարկումն էր: Հյուրերը նախ շնորհավորեցին Կարեն Կարապետյանին Երևանի քաղաքապետի պաշտոնում ընտրվելու կապակցությամբ` մաղթելով նրան ձեռքբերումներով լի աշխատանքային գործունեություն: «Երևան ջուր» ընկերության գլխավոր տնօրենը քաղաքապետին ներկայացրեց անցած 5 տարիների ընթացքում ընկերության կողմից մայրաքաղաքում իրականացված ծրագրերը: Երևանի քաղաքապետն ընդգծեց, որ առաջին հերթին «Երևան ջուր» ընկերության կողմից մեր համաքաղաքացիների համար մայրաքաղաքում պետք է ապահովվի որակյալ և անխափան ջրամատակարարում, ինչը ընկերության պայմանագրային պարտավորությունն է: Կարեն Կարապետյանի առաջարկությամբ՝ «Երևան ջուր» ընկերությունը առաջիկայում կներկայացնի մայրաքաղաքում ընկերության կողմից առ այսօր իրականացրած ներդրումները, ինչպես նաև կներկայացնի ջրային կորուստների և հավաքագրման արդյունքների վերաբերյալ տեղեկատվություն: Երևանի քաղաքապետն ընդգծեց, որ մայրաքաղաքի բնակչության սոցիալական խնդիրները պետք է լինեն օրակարգային, և նմանատիպ հանդիպումները հաճախակի բնույթ կկրեն:
Երևանի քաղաքապետարանի տեղեկատվության և հասարակայնության հետ կապերի վարչություն:
