Պարզվում է, Հայաստանով հետաքրքրվողների ցանկում տարեցտարի նոր երկրների անուններ են հայտնվում: Հայաստանի պոտենցիալ զբոսաշրջիկները Սփյուռքի ներկայացուցիչներն են, սակայն որպես զբոսաշրջային կենտրոն` մեր երկիրը գրավում է նաև Վրաստանի և ԱՊՀ երկրների զբոսաշրջիկներին: Վերջին տարիներին Հայաստան եկող զբոսաշրջային այցերի միտում, հետևաբար` հետաքրքրություն կա Իրանի, Եվրամիության երկրների, ԱՄՆ-ի, Սկանդինավյան երկրների, իսկ վերջին երկու տարում` նաև Թուրքայի զբոսաշրջիկների կողմից:
Համաձայն Զբոսաշրջության համաշխարհային կազմակերպության վիճակագրական տվյալների` Հայաստան այցելող զբոսաշրջիկների 62,2 տոկոսը մեր հայրենակիցներն են: Հարազատներին և ընկերներին այցելած զբոսաշրջիկները կազմում են Հայաստան այցելող զբոսաշրջիկների 44,8 տոկոսը: Զբոսաշրջիկների 2,4 տոկոսը Հայաստան է այցելում համաժողովներին մասնակցելու և գործնական այլ նպատակներով: 13,1 տոկոսը մեր երկիրը դիտարկում է հանգստի և ժամանցի վայր, իսկ 5,4 տոկոսը Հայաստան է այցելում կրթություն ստանալու և բուժվելու համար:
Եթե 2008 թ. Հայաստան է այցելել 588 հազ. զբոսաշրջիկ, որը 9,4%-ով ավելի է 2007 թ. ցուցանիշից, ապա 2009-ի առաջին կիսամյակում Հայաստան այցելած զբոսաշրջիկների թիվը կազմել է 207 729 մարդ:
