«Իհարկե, ճիշտ են անում, որ Բեգլարյան Գագիկին փոխարինում են Կարեն Կարապետյանով, այնուամենայնիվ դա ավելի ճիշտ է, բայց ո՞վ էր բերել Բեգլարյան Գագիկին»,- այսօր լրագրողների հետ հանդիպմանը նման հարցադրում արեց ՀՀ նախկին վարչապետ Հրանտ Բագրատյանը: «Բայց ես հիմքեր չունեմ հիացած լինելու Կարեն Կարապետյանի աշխատանքից Հայռուսգազարդում: Նրա աշխատած 8-9 տարիների ընթացքում գազի ներտնտեսական ինքնարժեքը 8 դոլարից դառել է 190 դոլար: Դրան գումարվում է 180 դոլար ռուսական գազի գինը, որ ստանում ենք սահմանի վրա. դա ես չեզոքացնում եմ: Այսինքն` ենթադրենք գազը ռուսները մեզ տվել են ձրի: Ստացվում է, որ գազի ներքին տեղափոխման գինը ինքը 8 դոլարից դարձրել է 180 դոլար: Ուկրաինայում դա 20 դոլար է, երբ Ուկրաինան տարածքով 28 անգամ մեծ է Հայաստանից, Ռուսաստանում` 49 դոլար է, Ռուսաստանն էլ Հայաստանի տարածքից մեծ է 600 անգամ»,- ասաց Բագրատյանը` հիշելով նաև գազի գնի վերջին թանկացման վերաբերյալ իր դիտարկումները, որի հիման վրա մոտ 10 ամիս առաջ ՀԱԿ-ը դիմել էր դատարան: Ինչ վերաբերում է նախարարների վերջին փոփոխությանը, ապա Հ. Բագրատյանը նշեց, որ արդարադատության նոր նախարարին չի ճանաչում, իսկ տնտեսական բլոկում փոփոխություն չի եղել. «այնտեղ գումարելիների տեղերն են փոխել, դրանից գումարը չի փոխվում»,- ասաց Բագրատյանը: Ըստ նրա, սակայն, շատ մեծ է հավանականությունը, որ առաջիկայում վարչապետ դառնա նորընտիր քաղաքապետ Կարեն Կարապետյանը: «Ամենայն հավանականությամբ Կարեն Կարապերյանը այսօր դիտարկվումէ որպես վարչապետի թեկնածու, որովհետև վարչապետին, պարզ է, բոլորն ուզում են հանել: Իր խոսքերով ու չակերտավոր մտքերով արդեն на порядок զզվեցրել է բոլորին իշխանության մեջ, այդ թվում` Սերժ Սարգսյանին: Հաջող տարբերակը գտնելու դեպքում նա Տիգրանին անմիջապես կհանի: Այսօրվա վիճակով ամենահավանական թեկնածուն Կարեն Կարապետյանն է, պակաս հավանականը Վաչեն է Գաբրիելյան, որը նույնպես խելոք կաշխատի, ոչ մի բան չի անի, բայց ի տարբերություն Տիգրան Սարգսյանի` անհասկանալի ճառեր չի ասի: Ես սա տեսնում եմ»,- ասաց Բագրատյանը:
