«Կոնգրեսն է ձևավորում քաղաքական օրակարգ»

Հայ ազգային կոնգրեսի մաս կազմող Հայաստանի լիբերալ կուսակցության առաջնորդ Հովհաննես Հովհաննիսյանը, «Առաջին լրատվականի» հետ զրույցում ամփոփելով տարին, նշեց, որ անցնող տարում Հայաստանի համար բավականին լուրջ իրադարձություններ տեղի ունեցան` թե՛ արտաքին, թե՛ ներքին քաղաքական կյանքում, թե՛ ԼՂ հիմնախնդրի հարցում, թե՛ ԵՄ-ի հետ հարաբերությունների հարցում: «ԼՂ խնդրի կարգավորման հարցում Հայաստանը շատ լուրջ հետընթաց է ապրում, և Սարգսյանի ու Ալիևի ամեն հանդիպումից հետո ու առաջ Հայաստանի այն բոլոր խաղաքարտերն ու դիվիդենտները, որով ինչ-որ չափով ժամանակին կարողանում էինք դիմակայել գործընթացներին, դրանք ամեն անգամ կորցնում են»,- ասում է Հովհաննիսյանը: Ինչ վերաբերում է ընդդիմությանը, ապա Հովհաննես Հովհաննիսյանի խոսքով, ամենամեծ ձեռքբերումը, որ Հայ ազգային կոնգրեսն ունի, այն է, որ այն ապացուցեց թե՛ ժողովրդին և թե՛ միջազգային հանրությանը, որ Հայաստանում ձևավորված է քաղաքական ալյանս, որը ձևավորված լուրջ քաղաքական մի մարմին է, ինչպիսին գոյություն չի ունեցել վերջին քսան տարիների ընթացքում, և որը նաև աննախադեպ է ողջ հետխորհրդային տարածքում: «Կոնգրեսը կարողացավ ապացուցել, որ նա պատրաստ է դիմակայելու բոլոր հարվածներին, մինչև անգամ մարտիմեկյան ջարդին: Սակայն Կոնգրեսի ամենամեծ ձեռքբերումը համարում եմ այն, որ կարողացավ վերջնականապես համոզել, որ Հայաստանում գոյություն ունի լուրջ քաղաքական ալյանս, և որը, ուզեն թե չուզեն, այսօր ձևավորում է Հայաստանի քաղաքականությունը: Այսօր Կոնգրեսում է և Կոնգրեսի առաջնորդ Լևոն Տեր-Պետրոսյանի մոտ է ձևավորվում երկրի քաղաքական օրակարգը: Իշխանությունները քաղաքական օրակարգ չեն կարողանում ձևավորել, քանի որ նրանք քաղաքական օրակարգ չունեն: Իհարկե, այնպես չէ, որ մենք կարողացանք ամեն ինչ անել, այնպես չէ, որ մենք ամեն ինչ կարող ենք անել, որովետև այն խաղի կանոնները, որով մենք առաջնորդվում ենք, տարբեր են: Մենք խաղում ենք քաղաքակիրթ խաղի կանոններով, մինչդեռ իշխանությունները չեն խաղում այդ քաղաքական կանոններով: Այնպես որ, խաղի կանոնների այդ հսկայական տարբերությունը որոշակի առումով կաշկանդում է այն գործողությունները, որոնք կատարում են Կոնգրեսը և ընդդիմությունը»,- հայտարարեց ՀԼԿ առաջնորդը: