«Հանրապետություն» կուսակցության ղեկավար Արամ Սարգսյանը, «Առաջին լրատվականի» հետ զրույցում ամփոփելով անցնող տարին, նշեց, թե ասել, որ ինքն ամբողջությամբ բավարարված է ընդիմության և մասնավորապես, «Հանրապետություն» կուսակցության` որպես ընդդիմության մասնիկի գործունեությունից, ճիշտ չէր լինի, որովհետև այդ դեպքում, այն, ինչ խոստացել էր ընդդիմությունը հասարակությանը, արդեն իրականություն դարձած կլիներ: «Իսկ մենք հասարակությանը խոստացել ենք իշխանափոխություն, սահմանադրական կարգի վերականգնում, դատական, տնտեսական համակարգերում արդարության և հավատի ամրապնդում: Այս բաներին դեռ չենք հասել: Ասել, թե ոչինչ չենք արել այդ ուղղությամբ, և խնդիրը նույնությամբ է մնացել, որ դա մեր վատ աշխատանքի հետևանքն է, այդ դեպքում էլ այդքան ճիշտ չի լինի, որովհետև այս դեպքում էլ ընդդիմությունը շատ մեծ աշխատանք է արել, և այդ աշխատանքի արդյունքում է նաև այն, որ քաղաքական տեղաշարժեր են լինում երկրում, քաղբանտարկյալներ են ազատ արձակվում, իրավիճակներ են փոխվել, թե՛ արտաքին քաղաքական, թե՛ ներքաղաքական դրսևորումներ են տեղի ունեցել: Եվ այդ ֆոնին ընդդիմության աշխատանքները` թե՛ հանրահավաքի հարթակում, թե՛ հասարակական ակտիվության առումով և թե՛ չերևացող մասում` արտաքին քաղաքական դաշտում, համարում եմ բավարար և ավելի քան համոզված եմ, որ այդ գործընթացները իրենց պտուղները դեռ տալու են: Մենք մեր առաջ խնդիր ենք դրել հասնել արտահերթ ընտրությունների, և ես ուզում եմ հույս հայտնել, որ մենք դրան միանշանակ պիտի կարողանանք հասնել: Տա Աստված, որ 2011 թվականը լինի մեր այդ ծրագրերի իրականացման տարի»,- նշեց Արամ Սարգսյանը: «Հանրապետություն» կուսակցության ղեկավարի խոսքով, էական չէ` տարի՞ է փակվում, թե՞ ամիս է փակվում, թե՞ օր. խնդիրն այն է, որ այս իշխանությունների օր ավել մնալը խնդիր է առաջացնում մեր երկրի համար ու մեկ օրն էլ կարևոր է: «Այնպես որ, անելու ենք այն, ինչ մինչև հիմա արել ենք, փորձելու ենք ավելի գրագետ, ավելի ջանասիրաբար դա անել»,- հայտարարեց Արամ Սարգսյանը: