Այսօր ռուսական Коммерсант թերթը հրապարակել է մի հոդված, որն անվանել է «Կովկասի նկատմամբ վերջին հնարքը» (Последний бросок на Кавказ), որում լրագրողը պատմել է, թե ինչպես է երեկ Ռուսաստանի վարչապետ Պուտինը հնարքներ իրականացրել կովկասցի մարզիկների դեմ` մարզվելով նրանց հետ Սանկտ Պետերբուրգի մարզադահլիճներից մեկում:
Լրագրող Անդրեյ Կոլեսնիկովը գրում է, որ ամբողջ երեկո Պուտինը պայքարում էր կովկասցիների հետ և, հավանաբար, իրականացրեց ամենանուրբ հնարքներից մեկը:
Երեկ երեկոյան Հայաստանի վարչապետ Տիգրան Սարգսյանի հետ հանդիպումից հետո Պուտինը եկել է մարզասրահ, որտեղ մի քանի հնարքներ է իրականացրել մարտական մարզաձևերի ներկայացուցիչների հետ:
Նա կիմոնո հագած բարձրացել է տատամի և մարզվել ձյուդոյի հավաքականի հայազգի մարզիկ Գալստյանի հետ (ցավոք, անունը չի նշվում): Թերթը նշում է, որ Պուտինի հնարքների մեջ ինչ-որ հատուկ բան կար, դրանք չափազանց կտրուկ էին. Հավանաբար, Պուտինը ինչ-որ բանի շուրջ համաձայնության չէր եկել Հայաստանի վարչապետի հետ։
Վլադիմիր Պուտինը կոշտ նետումներ էր կիրառում Գալստյանի նկատմամբ, որն առանց այդ էլ հազիվ էր ոտքի վրա մնում, երբ նայում էր վարչապետին:
Կողքի մարզագորգերում ևս այլ մարտական ձևերի մարզիկներ կային, որոնց հետ Պուտինը նույնպես որոշ ժամանակ հնարքներ էր իրականացնում: Սա, հավանաբար, անում էր մի պարզ պատճառով. նախորդ օրը նա ծաղիկներ էր դրել ծեծկռտուքի ժամանակ սպանված՝ «Սպարտակ» ֆուտբոլային ակումբի երկրպագու Եգոր Սվիրիդովի գերեզմանին:
Այս անգամ Պուտինը շփվում էր միայն կովկասցի մարզիկների հետ` ցույց տալով, որ տարբերություն չի դնում վերջին օրերին հակամարտող կողմերի միջև:
