Ինչպես հաղորդում է Reuters լրատվական գործակալությունը, Միացյալ Նահանգների կենտրոնական հետախուզական վարչության (ԿՀՎ) կազմում ստեղծվել է WikiLeaks-ի արտահոսքի պատճառներն ու դրա վնասները հետաքննող խումբ, որը կոչվել է WikiLeaks Task Force – WTF (թարգմանաբար WikiLeaks-ի գործով խումբ): Ինչպես հաղորդում է The Washington Post-ը՝ «Վարչության տնօրենը հանձնարարություն է տվել խմբին ուսումնասիրել, թե արդյոք WikiLeaks-ի հրապարակումները կարո՞ղ են վնասել միջազգային հարաբերություններին կամ վարչության գործողություններին»: Այս մասին թերթին ասել է ԿՀՎ մամուլի խոսնակ Ջորջ Լիթլը:
Սակայն այս լուրը հետաքրքիր է ոչ միայն նրանով, որ ստեղծվել է այսպիսի խումբ, այլ այդ խմբի հապավումով: WTF հապավումը համացանցում հայհոյանք է նշանակում, որի թարգմանությունը չենք ցանկանում այս պահին ներկայացնել: Միայն զարմանք է առաջացնում այն փաստը, որ ԿՀՎ-ում չի գտնվել մեկը, որը կասեր՝ WTF հապավումն անպարկեշտ արտահայտություն է համացանցում: Հիմա միայն կարելի է կռահել, թե ինչ հեգնական հրապարակումների տեղիք կտա այս լուրը:
