ԱՄՆ-ում անցած շաբաթ թուրքական կառավարության և բանկերի դեմ գործ հարուցած հայկական ընտանիքի փաստաբաններից մեկը՝ հայազգի Մարկ Գերագոսը, որը եղել է նաև երգիչ Մայքլ Ջեքսոնի փաստաբանը, հարցազրույց է տվել թուրքական Haberturk-ին: Լինելով Թուրքիայից գաղթած հայ ընտանիքի շառավիղ` արդեն 11 տարի իր անձնական խնդիրն է համարում Թուրքիայի դեմ նման գործեր հարուցելը, քանի որ «Թուրքիան հայերի ձեռքից խլել է այդ տարածքները և 90 տարի օգտագործում է, հետևաբար դրա համար պատասխանատվություն է կրում»:
«Բոլոր գործերը հարուցվում են փողի համար, բայց միևնույն ժամանակ զոհերին հարգանքի տուրք մատուցելու համար,- շարունակում է փաստաբանը,- եթե Թուրքիան խելացի լինի, տարածքների մի մասը Հայաստանին կտա, օրինակ՝ Արարատ լեռը: Թուրքիան իր պատմության հետ պետք է հաշվի նստի»: Նրա կարծիքով՝ այս տարի Օբաման կօգտագործի ցեղասպանություն բառը: Իսկ լրագրողի այն հարցին, թե եթե իր փոխարեն նստած լիներ վարչապետ Էրդողանը, ինչ կասեր նրան, Գերագոսը ասում է. «Երկրիդ համար այն, ինչ որ լավ է՝ արա, հրաժարվիր մերժումից, ճանաչիր Ցեղասպանությունը և ճիշտը ընդունիր»: