Դարձյալ հայ և հույն հոգևորականների միջև բախում է տեղի ունեցել Բեթղեհեմ քաղաքի Սուրբ Ծննդյան եկեղեցում։
Ըստ Associated Press–ի՝ հայերն ու հույները վեճի են բռնվել Ծննդյան տոների կապակցությամբ եկեղեցում իրականացվող մաքրման համար իրենց հատկացված հատվածի շուրջ։
Միայն ոստիկանների միջամտության շնորհիվ է հաջողվել իրարից բաժանել կողմերին։ Դեպքի կապակցությամբ ձերբակալվածներ չկան։
Հայ առաքելական, Հույն ուղղափառ և Հռոմի կաթոլիկ եկեղեցիները տնօրինում են եկեղեցու տարբեր հատվածները, և նրանց միջև տարբեր առիթներով հաճախ վեճեր են բռնկվում։ Հատկապես հայ և հույն հոգևորականների միջև ծեծկռտուքի վերածվող վեճերն ավանդույթ են դարձել։
Ամենաուժեղ բախումը հոգևորականների միջև տեղի է ունեցել 2009 թ. դեկտեմբերին, երբ դարձյալ վեճի առիթ է դարձել մաքրությունը։ Պարզվում է, որ եկեղեցու հատակն ու ստորին պատերը մաքրելը հայերի գործն է, իսկ վերևի պատերն ու պատուհանները պետք է մաքրեն հույները։ Հույների մաքրելու ժամանակ, սակայն, հայերը պետք է ներկա գտնվեն, քանի որ հատակը «հայերինն է»։ Հույներն այն ժամանակ պահանջել էին, որ իրենց աշխատելու ժամանակ հայերը ներկա չգտնվեն, իսկ հայերը հրաժարվել էին հեռանալ։
