Հայաստանի 343 ամենախոշոր հարկատուները 2010թ. հունվար-հոկտեմբեր ամիսներին, նախորդ տարվա նույն ժամանակահատվածի համեմատ, ավելի քիչ են ավելացրել բյուջե վճարվող հարկերն ու այլ պարտադիր վճարները, քան այդ 343 հարկատուներից հետո եկող հարկատուները: Սա երևում է ՊԵԿ-ի կողմից երեկ հրապարակված խոշոր հարկ վճարողների՝ 2010թ. հոկտեմբեր ամսվա մոնիտորինգի ամսական ամփոփ ցուցանիշների վերլուծականից: Մոնիտորինգի ենթարկվող 343 խոշոր հարկ վճարողները 2010թ. հունվար-հոկտեմբեր ամիսներին ավելացրել են իրենց կողմից պետական բյուջե վճարվող հարկերն ու այլ պարտադիր վճարները ընդամենը 8.5%-ով: Սակայն ինչպես երևում է ֆինանսների նախարարության հրապարակած պետական բյուջեի կատարման օպերատիվ հաշվետվություններից, նույն ժամանակահատվածում բյուջեի ողջ հարկային եկամուտներն ու այլ վճարները ավելացել են ավելի մեծ չափով` 15.5%-ով: Սա նշանակում է, որ 343 խոշորներից հետո եկող հարկատուները 15.5%-ից էլ մեծ տոկոսով են ավելացրել հարկերն ու այլ պարտադիր վճարները, որի արդյունքում էլ ընդհանուր միջին ցուցանիշը եկել-կազմել է 15.5%: Այսինքն` բյուջեի եկամուտների ապահովումը գնալով ավելի ու ավելի մեծ չափով է դրվում 343 խոշոր հարկատուներից հետո եկող հարկատուների վրա: