Չիլիի 13 բնակիչ (11 կին և 2 տղամարդ) այրվածքներ են ստացել ավանդական լատինո-ամերիկյան չուրոս ուտելիքը պատրաստելու ժամանակ: Նրանք այդ ուտեստը պատրաստել են տեղական La Tercera թերթում տպագրված բաղադրատոմսով:
Ինչպես նշում է Associated Press գործակալությունը, դեկտեմբերի 26-ին Չիլիի բարձրագույն դատարանը, վերանայելով 13 տուժածի հայցը, վճիռ է կայացրել, որ թերթը պետք է տուժած ընթերցողներին վճարի 125 հազար ԱՄՆ դոլարին համարժեք փոխհատուցում:
Թերթում տպագրված բաղադրատոմսը փորձարկելուց հետո հիվանդանոց է դիմել 13 մարդ, որոնք այրվածքներ են ստացել թերթում նկարագրված չուրոսը պատրաստելու ժամանակ:
Դատարանը, վերանայելով հայցը, եկել է այն եզրակացության, որ թերթի խմբագրությունը չի կատարել անհրաժեշտ ստուգումները նախքան բաղադրատոմսը տպագրելը: Հետաքննության արդյունքում պարզվել է, որ եթե ճշգտորեն հետևեն բաղադրատոմսին, հավանականությունը մեծ է, որ մինչև նշված ջերմաստիճանը տաքացված վառարանում տեղադրված խմորի ձեթը պայթի, իսկ խոհանոցում ուտեստը պատրաստող մարդը այրվածքներ ստանա:
Grupo Copesa-ի ներկայացուցիչները` La Tercera թերթի հրատարակիչները, հայտարարել են, որ չեն բողոքարկելու դատարանի որոշումը և տուժածներին վճարելու են նշված փոխհատուցումը:
