Երևանի և ՌԴ քաղաքների միջև գործընկերային հարաբերություններին առնչվող հարցեր են քննարկվել Երևանի քաղաքապետ Տարոն Մարգարյանի և Հայաստանի Հանրապետությունում ՌԴ արտակարգ և լիազոր դեսպան Վյաչեսլավ Կովալենկոյի հանդիպման ժամանակ։
Շնորհավորելով Տարոն Մարգարյանին Երևանի քաղաքապետի պատասխանատու պաշտոնում ընտրվելու կապակցությամբ՝ դեսպանը վստահություն է հայտնել, որ Երևանի և ՌԴ մայրաքաղաք Մոսկվայի և այլ քաղաքների միջև ձևավորված բարեկամական և տնտեսական կապերը հետագայում ևս կշարունակեն համաչափ զարգանալ:
Շնորհակալություն հայտնելով բարեմաղթանքների համար՝ քաղաքապետ Տարոն Մարգարյանը կարևորել է ինչպես հայ- ուսական դաշնակցային, այնպես էլ Երևանի քաղաքապետարանի և ՌԴ քաղաքների ու շրջանների հետ համագործակցությունը, ինչը ներկայում ոչ միայն բարձր մակարդակի վրա և բավականին ակտիվ է, այլև զարգացման լայն հեռանկարներ ունի։ Քաղաքապետը մեկ անգամ ևս ընդգծել է, որ Երևանի և ՌԴ քաղաքների միջև նախանշված բոլոր ծրագրերը կշարունակվեն և քաղաքապետարանը պատրաստակամ է ու բաց՝ փոխշահավետ նոր առաջարկներ ու ծրագրեր քննարկելու։ Այս մասին «Առաջին լրատվական»-ին տեղեկացնում են Երևանի քաղաքապետարանի տեղեկատվության և հասարակայնության հետ կապերի վարչությունից: