«Առաջին լրատվականը» ԱԺ փոխնախագահ, ՀՀԿ-ական պատգամավոր Սամվել Նիկոյանից հետաքրքրվեց, թե բանակում կատարվող սպանությունների մասին բարձրաձայնողներին մեղադրելու փոխարեն ճիշտ չէ՞ր լինի, որ ՊՆ բարձրաստիճան պաշտոնյաները հրաժարական տային և ենթարկվեին պատասխանատվության, որպեսզի այդ դեպքերը չկրկնվեին: «Դուք ունե՞ք թվերը, թե տարբեր տարիների որքան զոհեր են եղել բանակում: Եթե այդ թվերը ուսումնասիրեիք, ապա կտեսնեիք, որ դրանք կրճատվում են ամեն տարի: Իհարկե, ես համաձայն եմ, որ յուրաքանչյուր զինվորի կյանքը մի աշխարհ է և չափումների ենթակա չէ: Յուրաքանչյուր բանակ, այդ թվում` նաև մեր բանակը, ունի իր խնդիրները»,- ասաց Սամվել Նիկոյանը: ԱԺ փոխնախագահը նշեց, որ բանակում տեղի են ունեցել որոշ կադրային փոփոխություններ, որոնք ուղղված են այդ խնդիրները լուծելուն: ԱԺ փոխնախագահն ասաց նաև, որ մեր բանակը դարձել է ավելի թափանցիկ, և այնտեղ տեղի ունեցողը կես ժամ անց դառնում է մեր հանրության սեփականությունը: Պատասխանելով քաղբանտարկյալ Սասուն Միքայելյանի առողջական վիճակին վերաբերող հարցին` Սամվել Նիկոյանն ասաց, որ ցավում է նրա համար: «Ես շատ կուզեի, որ չլիներ մարտի 1, և չլինեին դրա հետևանքները: Ես չէի ուզենա, որ տեղի ունենար այն, ինչ եղավ մեր երկրում: Ես չէի ուզենա, որ Սասունը բանտում լիներ, և նրա կողքին դուք դնեիք Մուրադ Բոջոլյանի նկարը»,- ասաց Սամվել Նիկոյանը: