«Իրականում աճ ասածը տեղին չէ, մեր տնտեսությունը չի զարգանում»,- «Առաջին լրատվականի» հետ զրույցում նշեց ԿԲ նախկին նախագահ Բագրատ Ասատրյանը` գնահատելով ԱՎԾ-ի կողմից օրերս հրապարակված տվյալները, ըստ որոնց՝ ՀՆԱ աճը կազմել է 2.6%: «Ավելի ճիշտ կլինի ասել` անկումը կանխվեց, որովհետև ըստ տնտեսության ճյուղերի լուրջ տեղաշարժեր չկան, թեև համամասնությունները որոշակիորեն փոխվել են: Մասնավորապես, աճել է ՀՆԱ-ի մեջ արդյունաբերության տեսակարար կշիռը, ինչը պայմանավորված է հանքարդյունաբերության աճով, ինչն էլ իր հերթին պայմանավորված է պղնձի ու մոլիբդենի միջազգային գների աճով»,- ասաց Բ. Ասատրյանը: «Սակայն կարևորն այն է, թե պղնձի այս բարձր գներից ով է ավելի շատ օգտվում: Օգտվում են առանձին անհատեր և ոչ թե պետությունը կամ հասարակությունը: Ընդհակառակը, մենք գործ ունենք մեր հարստության կողոպուտի հետ»,- նշեց ԿԲ նախկին նախագահը: