Թուրքիան պետք է զգույշ լինի. Ֆրանսիայի համախոհությունը կորցնելը ոչ այնքան խելացի քայլ կլինի: «Առաջին լրատվական»-ի հետ զրույցում նման տեսակետ հայտնեց Հայ-շվեյցարական ընկերության պատվո նախագահ Սարգիս Շահինյանը`խոսելով օրերս Ֆրանսիայի խորհրդարանում ընդունված օրինագծի շուրջ:
Ըստ նրա` Ֆրանսիան որոշ չափով Թուրքիայի համախոհությունը կորցրեց, սակայն Թուրքիան պետք է զգույշ լինի, քանի որ Ֆրանսիայի համախոհությունը կորցնելը համաշխարհային ճակատում ոչ այնքան խելացի քայլ կլինի, և այս խնդրում ամենամեծ կորցնողը Թուրքիան է լինելու:
Անդրադառնալով հայ-ֆրանսիական հարաբերություններին` Ս. Շահինյանն ասաց, որ Հայաստանը պետք է փորձի բավարարել Ֆրանսիայի ախորժակը: Ըստ նրա` Սարկոզիի շարժառիթները մարդկային արժեքների պահպանությունն է և հայկական համայնքի թիկունքն ապահովելը նախագահական ընտրություններում: Նա կասկած չունի, որ նման կերպ կվարվեր ցանկացած թեկնածու, եթե լիներ նրա փոխարեն:
Այն հարցին՝ ինչո՞ւ մեծ աղմուկ բարձրացավ Ֆրանսիայում օրինագծի ընդունումից հետո, այն դեպքում, երբ Շվեյցարիան ընդունել և կիրառել է այս օրինագիծը, Ս. Շահինյանը պատասխանեց, որ Շվեյցարիան ԵՄ անդամ պետություն չէ, իսկ Ֆրանսիան ամենահռչակավոր երկրներից է Գերմանիայից հետո, որն ընդունել է այս օրինագիծը:
«Շվեյցարիան ոչ միայն ընդունել է, այլև կիրառել է այս օրենքը: Իմիջիայլոց՝ մեր կազմակերպության ջանքերի շնորհիվ: Այս օրենքի ներդրման գործընթացը սկսվել է եվրոպական 12 երկրներում: 6-ի դեպքում դա ավարտվել է, սակայն դրանք փոքր երկրներ են: Ֆրանսիայի այս քայլը մեծ աղմուկ բարձրացրեց, որովհետև դա Թուրքիայի համար ամենամեծ ապտակն էր»,- մեկնաբանեց Ս. Շահինյանը`հավելելով, որ այս քայլով Ֆրանսիան շատ կարևոր ազդակ է ուղարկում եվրոպական մյուս երկրներին, որ այս ուղղությունը ճիշտ է:
Անդրադառնալով հետագա զարգացումներին` Ս. Շահինյանն ասաց, որ դիվանագիտական կամ ծայրահեղական հնարավորությունները Թուրքիայում անսահման են: «Թուրքիան այս ոլորտում հեղինակություն է. որպես ապացույց կարող ենք հիշել, թե ինչպես վարվեց Իսրայելի հետ»,- ամփոփեց նա:
