ՀԱԿ ղեկավար ներկայացուցիչ Դավիթ Շահնազարյանի կարծիքով` Ֆրանսիայի Ազգային ժողովի կողմից Հայոց ցեղասպանությունը ժխտելու համար քրեական պատասխանատվություն սահմանող օրինագծի ընդունումը օգտակար չէր Հայաստանի համար:
«Ազատություն» ռադիոկայանի հետ զրույցում Շահնազարյանը թվարկել է այն չափանիշները, որոնցով ինքը գնահատում է արտաքին քաղաքական ոլորտում տեղի ունեցող իրադարձությունների օգտակարությունը` ազգային շահերի տեսանկյունից. «Ի՞նչ ազդեցություն դա կունենա Հայաստանի Հանրապետության վրա, Հայաստանի պետականության վրա, Հայաստանի Հանրապետության անվտանգության վրա և Հայաստանի Հանրապետության քաղաքացիների անվտանգության եւ նրանց կենսամակարդակի: Տվյալ դեպքում որևէ դրական ազդեցություն բոլոր իմ այս նշած չափանիշներով ես չեմ տեսնում»:
Ավելին, ընդդիմադիր գործիչը կարծում է, որ Ֆրանսիայի Ազգային ժողովի այս որոշման հետևանքով ավելի կմեծանա տարածաշրջանային լարվածությունը. «Է’լ ավելի փխրուն է դարձնում տարածաշրջանային անվտանգությունը,և նորանոր խնդիրներ է ստեղծում մեր պետության և մեր քաղաքացիների համար: Ժամանակն է, որ զգացմունքային այդ մոտեցումներից մենք լուրջ մոտեցումներ որդեգրենք և առաջնորդվենք առաջին հերթին հենց այն չափանիշներով, որ ես նշեցի»:
Հարցին` մի՞թե դրական չէ Ցեղասպանության ժխտման քրեականացման բուն փաստը և արդյո՞ք այդպիսով չի ակտիվանա Ցեղասպանության ճանաչման միջազգային գործընթացը, Շահնազարյանը արձագանքել է. «Ես միշտ էլ համարել եմ կոպիտ սխալ, երբ Ցեղասպանության միջազգային ճանաչումը դրվել է Հայաստանի արտաքին քաղաքականության նպատակների հիմքում: Դա դրվեց 1998-ից և դա միայն ու միայն վնաս է բերել թե’ Ցեղասպանության միջազգային ճանաչման գործընթացին, թե’ պետականությանը»:
Ֆրանսիայի ԱԺ-ի որոշումը նա հակված է դիտարկել այդ երկրում կայանալիք ընտրությունների համապատկերում. «Վստահ եմ, որ այդ որոշումը ամբողջապես տեղավորվում է Ֆրանսիայի նախագահական ընտրությունների առաջիկա տրամաբանության մեջ: Ակնհայտ է, որ բոլոր պետությունները, մասնավորապես, նաև Ֆրանսիան, առաջին հերթին հետապնդում են իրենց ազգային շահերը: Երկրորդը. ակնհայտ է, որ այս որոշումը Ֆրանսիայի Սենատ չի հասնի մինչև ընտրությունները, քննարկման չի դրվի: Ընտրություններից հետո էլ ինչ ճակատագիր կունենա, շատ ու շատ մեծ հարցականի տակ է»:
