Հայ ազգային կոնգրեսի Հրազդանի տարածքային կառույցի ղեկավար Մեսրոպ Մեսրոպյանը, «Առաջին լրատվական»-ի հետ զրույցում ամփոփելով անցնող տարին, կարծիք հայտնեց, որ այս տարին, ինչպես և մյուս տարիները, ընդդիմության համար և՛ հաջողված, և՛ չհաջողված տարրեր ուներ: «Չհաջողված էր այն իմաստով, որ չնայած երեք տարի է, ինչ շարժումը սկսել է իր պայքարը, սակայն, դժբախտաբար, այս տարի էլ չկարողացանք իրականացնել մեր հիմնական նպատակը: Բայց, մյուս կողմից, մենք հիմա ավելի մոտ ենք այդ նպատակին, գործնական իմաստով ավելի ուժեղ և կայացած ընդդիմություն ունենք, քան 2007-ին: Ինձ համար անհաջողություն է այն, որ մեր երկրում դեռ քաղբանտարկյալներ ունենք: Համարում եմ, որ ընդդիմությունը մեծ անելիքներ ուներ այդ առումով, ինչը մասամբ կարողացավ անել, և տղաների մի մասը արդեն ազատության մեջ է: Մնացած տղաները դեռ անազատության մեջ են, բայց վստահ եմ, որ մինչև գարուն բոլորը ազատության մեջ կլինեն»,- նշեց Մեսրոպյանը: Ինչ վերաբերվում է իշխանություններին, ապա, ըստ Մեսրոպյանի, նրանք «տրամաբանությունից դուրս քայլեր են անում»: «Այն, ինչ անում են իշխանությունները կեղծիք է, թեև անկեղծորեն կուզենայի, որ սխալ լինեի»,- նշեց Մեսրոպյանը:
