«Եվրոպական ինտեգրացիա» կազմակերպության ղեկավար Կարեն Բեքարյանն այսօր լրագրողների հետ զրույցում գնահատելով 2011թ. ընթացքում Հայաստանի հարաբերությունները հարևանների հետ` նշեց, որ դրանք շատ նորմաԼ են. «Ընդամենը երկու օր առաջ Իրանի Իսլամական Հանրապետության նախագահը այցելեց Հայաստան, տարվա ընթացքում մեր նախագահն է այցելել, փոխադարձ ընկալումը բավականին բարձր մակարդակի վրա է»:
Անդրադառնալով Սերժ Սարգսյանի և Ահմադինեժադի հանդիպման շրջանակում ընդունված համատեղ հայտարարությանը` Բեքարյանը շեշտեց, որ դրանում ԼՂ հարցի կարգավորման վերաբերյալ պարբերություն կա. «Մի քանի անգամ Իրանը կարծիք է հայտնել, որ ԼՂ հարցում Ադրբեջանի տարածքային ամբողջականությունը պետք է հարգվի: Իսկ վերջին հայտարարության մեջ նշված պարբերությունը բավականին հետաքրքիր է. նշված է միայն խաղաղ ճանապարհով, միջազգային նորմերի և սկզբունքներին համապատասխան, ինչն էլ նշանակում է, որ այդ սկզբունքներից որևէ մեկն առանձնացնել հնարավոր չէ: Այսինքն` հայ-իրանական երկխոսությունը հասել է այն մակարդակի, որ այսօր նման հայտարարություն նման տեքստով ստորագրել հնարավոր է»:
Վրաստանի հետ հարաբերությունները ևս, ըստ Բեքարյանի, բավականին բարձր են` անկախ նրանից, որ կան որոշակի խնդիրներ:
Խոսելով ներքաղաքական զարգացումների մասին` Բեքարյանը նշեց, որ այսօր ընտրությունների արդար և թափանցիկ անցկացման համար կան նախադրյալներ, և այդ ուղղությամբ բավականին աշխատանք կատարված է: Նրա կարծիքով` այսօր ներքաղաքական դաշտում ստեղծվել է մի իրավիճակ, որը հատուկ էր անկախացումից մինչև 1994թ. ժամանակահատվածին: Նրա խոսքերով` այսօր քաղաքական ուժերի միջև նկատվում է հանդուրժողականություն, բայց միայն դրանով չպետք է բավարարվել, պետք է այդ գործընթացը հասցնել իր ավարտին, իսկ այդ աշխատանքը, ըստ Բեքարյանի պետք է անեն ոչ միայն իշխանությունները, այլև քաղաքացիական ամբողջ դաշտը: