«Պոստ Սկրիպտում» մամուլի ակումբում այսօր հյուրընկալվել էին ԱԺ «Ժառանգություն» խմբակցության ղեկավար Ստեփան Սաֆարյանը և պատգամավոր Անահիտ Բախշյանը, ովքեր ամփոփեցին քաղաքական տարին, ներկայացրին խմբակցության աշխատանքները և առաջիկա ընտրություններին մասնակցելու իրենց ռազմավարությունը:
Ամփոփելով տարին` Ստեփան Սաֆարյանը հիշեցրեց, որ աջակցել են վրացական պետհամարանիշներով ավտոմեքենաների շուրջ եղած ակցիաներին, պաշտպանել են բացօթյա առևտրով զբաղվողների իրավունքները, զբաղվել են կրպակների ապամոնտաժման խնդիրներով: Ս. Սաֆարյանը հիշեցրեց նաև Րաֆֆի Հովհաննիսյանի հացադուլը:
Խորհրդարանական գործունեության ընթացքում իրենց կողմից 13 օրինագծեր են մտել շրջանառության մեջ, այլընտրանքային ընտրական օրենսգրքի տարբերակ են առաջարկել, հիշեցրեց Ս. Սաֆարյանը` հավելելով, որ հանդես են եկել նաև «Լյուստրացիայի մասին» օրինագծի նախաձեռնությամբ:
Սաֆարյանը ներկայացրեց, թե «Ժառանգության» ներկայացուցիչները որքան ելույթներ, հայտարարություններ, հարցեր են հնչեցրել ԱԺ-ում. նրանք անցնող տարում մասնակցել են 63 մամլո ասուլիսների, ինչպես նաև միջազգային կառույցների խորհրդարանական վեհաժողովներին:
2011 թվականը մեր հասարակության մեջ որևէ լավ հիշողություններ չի արթնացնելու, նկատեց Ս. Սաֆարյանը. «2011-ը փոթորկումների տարի էր: Որքանո՞վ էր իշխանությունը լրջորեն տրամադրված իրավիճակը շտկելու հարցում: Մենք տեսնում ենք, թե ուր ենք հասել` պատվիրված, ապա փակ երկխոսություն…»,- նկատեց Ս. Սաֆարյանը:
Անդրադառնալով արտաքին քաղաքական հարցերին և մասնավորապես հայ-թուրքական հարաբերությունների կարգավորմանը` Ս.Սաֆարյանը նկատեց. «Բախտներս բերեց Իլհամ Ալիևի ախորժակի և Էրդողանի ցինիկության պատճառով»:
ԼՂ հարցում Ս. Սաֆարյանը իրեն դասում է լավ տեղեկացված հոռետեսների շարքում: Նրա կարծիքով` Մադրիդյան սկզբունքները չեն կարող ԼՂ հարցի խաղաղ կարգավորում ապահովել: Ըստ Ս. Սաֆարյանի`անցնող տարում Հայաստանի Հանրապետության գործոնը սկսեց աստիճանաբար կարևորվել, թեև արդյունքներ չկային:
