«2012-2013 թվականները եվրոպական ինտեգրման առումով պետք է լինեն փորձաքարային»,- այսօր լրագրողների հետ հանդիպման ժամանակ նման կարծիք հայտնեց «Եվրոպական ինտեգրացիա» կազմակերպության ղեկավար Կարեն Բեքարյանը:
Նա իր կարծիքը հիմնավորեց նրանով, որ գալիք երկու տարիները ընտրական են, և եթե դրանք իսկապես անցնեն արդար և թափանցիկ, ապա կարագանա եվրաինտեգրման գործընթացը:
Անդրադառնալով ԼՂ հիմնախնդրին` Բեքարյանը նշեց. 2011-ին Ադրբեջանը ցույց տվեց, որ ինքը ստատուս քվոյի ամենամեծ ջատագովն է: Ըստ նրա` այս տարի դա պարզ էր նաև միջազգային հանրությանը: Դրա ապացույցն էին կազանյան հանդիպումն ու «Ֆորմուլա վլաստի»-ն Ալիևի տված հարցազրույցը: Ըստ Բեքարյանի` անցյալ տարի Ադրբեջանը կատարեց երկու քայլ, որոնք անշուշտ ազդելու են ԼՂ հարցի կարգավորման վրա: Դրանք են`Ադրբեջանի անդամակացությունը ՄԱԿ-ի ԱԽ-ին և Չմիավորման շարժմանը:
Բեքարյանը նաև նշեց` Հայաստանը բազմիցս է հայտարարել, թե Ադրբեջանի արկածախնդիր պահվածքի դեպքում կճանաչի ԼՂ անկախությունը: Ըստ Բեքարյանի` արդեն ժամանակն է այդ արկածախնդրությունը դիտարկել ոչ միայն ռազմական, այլ նաև քաղաքական կոնտեքստում. բանակցային գործընթացում ադրբեջանական կողմի ցանկացած կապիկություն ընդունելի չէ: