«Առավոտ» թերթի գլխավոր խմբագիր Արամ Աբրահամյանը, մեկնաբանելով ԱԺ-ի կողմից «Լեզվի մասին» և «Հանրակրթության մասին» օրենքներում փոփոխությունների նախագծի ընդունումը, նշում է, որ այդ օրենքում սխալ միտք է դրված, թե որակյալ և ժամանակակից պահանջներին համապատասխան կրթություն կարելի է ստանալ միայն օտար լեզվով. ««Լեզվի մասին» օրենքի առաջին ընթերցումից հետո շատ բան է փոխվել, սակայն օրենքի գաղափարը մնացել է նույնը, դրա համար ես շարունակում եմ դեմ լինել: Այս օրենքը Հայաստանի պետական լեզվի զարգացմանը բացառապես չի նպաստում: Լինելու են էլիտար դպրոցներ, որտեղ առարկաները դասավանդվելու են ոչ հայերեն լեզվով։ Այդ էլիտար դպրոցների շրջանավարտների կամ աշակերտների և մնացած բոլոր դպրոցների աշակերտների միջև մրցակցություն կսկսվի: Այսինքն՝ ամենատաղանդավորները պետք է ամենավճարունակները լինեն: Սոցիալական հակասություններ կսկսվեն այդ փոքր խմբի և մնացած բոլոր երեխաների միջև, դրա համար ես, ինչպես այն ժամանակ, այնպես էլ հիմա, այդ փոփոխություններին դեմ եմ»,- ասում է Արամ Աբրահամյանը: