Եվրոպան ֆինանսական աշխարհում բավական լուրջ իրավիճակ է ստեղծել: Պարտքերի մեջ խրված Եվրոպական երկրների պարտավորությունների չկատարման վտանգը վախ է հարուցում ֆինանսական շուկայում: Քանի որ տարին մոտենում է ավարտին, բանկերն ու բաժնետերերը ուշադրությամբ հետևում են եվրոպական քաղաքական և ֆինանսական գործիչների քայլերին, որոնք ջանքեր են գործադրում՝ խոչընդոտելու տասնյոթ ազգերից բաղկացած եվրոպական տարածության փլուզմանը:
Մի քանի այլ կարևոր իրադարձություններ ևս իրենց վրա սևեռեցին գլոբալ տնտեսության ուշադրությունը այս տարվա ընթացքում: Բրիտանական հեռախոսային հակերական սկանդալը ցնցեց Ռուպերտ Մերդոքի՝ Ամերիկայում հիմնված տեղեկատվական կայսրության հիմքերը։ Միջուկային աղետը Ճապոնիայում խոչընդոտեց ԱՄՆ-ում ավտոգործարանների կառուցմանը։ Գազի գները աճեցին Միջին Արևելքում առկա անհանգստությունների և Լատինական Ամերիկայում ու Ասիայում դրա պահանջարկի մեծացման պատճառով:
ԱՄՆ-ում քաղաքական խնդիրները բերեցին կառավարական պարտքի համար առաջին կրեդիտային անկմանը: Եվս մեկ տարի տնտեսությունը հիասթափեցնող փուլում էր գտնվում։ Դրան այս տարի գումարվեց Սթիվ Ջոբսի մահը:
Եվրոպական տնտեսական ճգնաժամը այս տարվա ամենալուրջ բիզնես խնդիրն է ճանաչվել Միավորված մամուլի բիզնես խմբագիրների կողմից: Այս մասին գրում է www.nj.com կայքը: Կառավարական պարտքերը լուրջ դժվարություններ են առաջացնում գլոբալ տնտեսության մեջ: Պորտուգալիան դարձավ երրորդ երկիրը՝ Հունաստանից և Իռլանդիայից հետո, որը մեկ տարի առաջ հայտնեց, թե պարտքերի պատճառով օգնության կարիք ունի: Բաժնետերերը անհանգստություն են հայտնում, որ մեծ պարտքեր ունեցող երկրները, ինչպիսք են Իտալիան և Իսպանիան, ևս կարող են հայտնվել այդ իրավիճակում: Բանկերը մտահոգվում են, որ նրանք և նրանց գործընկերները ի վիճակի չեն լինի ծածկել կորուստները, եթե կառավարությունները չկատարեն իրենց պարտականությունները:
Վերլուծաբանները կանխատեսում են, որ ԱՄՆ-ի թիվ մեկ առևտրային գործընկեր հանդիսացող Եվրոպայում այսօր գրանցվող անկումը կկրճատի ԱՄՆ տնտեսական աճը հաջորդ տարվա ընթացքում: