Այս վերնագրով այսօր Lenta.ru կայքում ներկայացվել է Ալեքսեյ Պոնոմորյով լրագրողի վերլուծական հոդվածը, որը նվիրված է Մոսկվայում վերջերս տեղի ունեցած ազգայնական բախումներին և հայ երիտասարդ Լևոն Արզումանյանի մասնակցությանն այդ միջադեպերին:
Լրագրողը գրում է, որ սպիտակ և սև շարֆով երիտասարդը շփոթեցրել է բլոգերներին և լրագրողներին: Ռունետում այս դեպքերի մասին եղան շատ հակասական հրապարակումներ, որոնք երբեմն կրում էին սադրիչ բնույթ: Դեկտեմբերի 17-ին այդ քննարկումների հիմնական հերոս է դարձել ոմն Լևոն Արզումանյան, որը նացիստների պես ձեռքը վեր պարզելով՝ մերթ հայտնվում էր «Մանեժնայա» հրապարակի դեպքերի ժամանակ, մերթ` «Եվրոպական» առևտրի կենտրոնի մոտ: Քննարկումներն էլ ավելի բուռն դարձան, երբ պարզվեց, որ Լևոնը երկար ժամանակ եղել է Մոսկվայի ոստիկանության վարչության մամուլի խոսնակ Վիկտոր Բիրյուկովի հետ:
Արզումանյանի վերաբերյալ հրապարակումները հակասական էին: Երբ հայտնի էր դարձել, որ անկարգությունները հրահրվել էին ոմն Մակարովի կողմից, որը, հետագայում պարզվել էր, Տամբովի «Նաշի» իշխանական երիտասարդական շարժման անդամ է, նույն «նաշիստներն» իրենց խողովակներով պարզել էին, որ դա ոչ թե Մակարովն է, այլ ոմն Լևոն Արզումանյան, որի նկարները հետագայում գտել էին «ВКонтакте» սոցիալական ցանցում:
Բայց իշխանավորները չկարողացան խուսափել իրենց մասնակցության վերաբերյալ խոսակցություններից, քանի որ պարզ դարձավ, որ այս հայ երիտասարդը նույնպես կապ ունի «նաշիստների» հետ: Բացի այդ, մասնակցել է իրենց «բազեական» հավաքներին Սելիգերում, որտեղ պարբերաբար այցելում են Ռուսաստանի ղեկավարները:
Իսկ Բիրյուկովի հետ նկարներն արդեն մեծ աղմուկ բարձրացրին: Սակայն, որոշ տեղեկություններով, այդ երիտասարդն ինքն է փորձել ամեն կերպ հայտնվել Բիրյուկովի կողքին: Գտան նաև Արզումանյանի նկարները «Մանեժնայա» հրապարակում, որտեղ նա սպանված Եգոր Սվիրիդովի նկարով է: Նա նաև հասցրել է հարցազրույց տալ թերթերից մեկին` թույլ տալով որոշ խորհրդավոր արտահայտություններ. «Նոր սկիզբ է լինելու, իմ ընկեր: Այս ամենը մասսաների ամենաթողության արդյունքն է: Անգործությունն է այս ամենի պատճառը, և դրա համար կան շատ պատճառներ»,- ասել է նա լրագրողին:
Բլոգերներից մեկն էլ եզրակացրել է, որ այստեղ ամեն ինչ ավելի պարզ է՝ «մեր առաջ սովորական սադրիչ է, գավառական մի հիմար, և այս ամենն անում է, որպեսզի հետագայում իր նկարներով գլուխ գովի»:
Սակայն, եզրակացնում է հեղինակը, շատ հնարավոր է, որ Լևոն Արզումանյանի այս լուրը ուղղակի ինտերնետային համայնքի երևակայությունների լուրջ հետևանք է, ինչին ականատես ենք եղել վերջին մի քանի օրերին: Այս ամենը լրագրողն ուղղակի համարում է սադրանք և բլոգերների կողմից «ծաղկեցրած» պատմություն: