«Ավազակային հարձակում Մեղրաձորում» հրապարակման մեջ տեղեկացրել էինք, որ դեկտեմբերի 21-ին՝ ժամը 00.20-ին, ոստիկանության Հրազդանի բաժնում ահազանգ էր ստացվել, որ Մեղրաձոր գյուղի տներից մեկում ավազակային հարձակում է կատարվել: Դեպքի վայր մեկնած օպերատիվ խմբին 1979 թ. ծնված Տաթևիկ Պ.-ն հայտնել էր, որ դեկտեմբերի 20-ին՝ ժամը 23.50-ի սահմաններում, երկու անծանոթներ բնակարանի դուռը թակելուց հետո մտել էին ներս և, դանակի սպառնալիքով հափշտակելով 307.000 դրամ և 80.000 դրամ արժողության ոսկյա զարդեր, դիմել փախուստի:
Ոստիկանության Կոտայքի մարզային վարչության, Կոտայքի քննչական բաժնի և Հրազդանի բաժնի ծառայողները պարզել են, որ Տաթևիկ Պ.-ի նկատմամբ ավազակային հարձակում չի կատարվել, այլ նրա կողմից եղել է հանցագործության մասին սուտ մատնություն. նա ծախսել էր ՌԴ-ում գտնվող ամուսնու ուղարկած գումարները, իսկ ոսկյա զարդերը՝ գրավադրել բանկում, և սուտ մատնություն էր կատարել ու ավազակային հարձակման պատրանք ստեղծել, որպեսզի արդարանա դեկտեմբերի 21-ին ՌԴ-ից վերադարձող ամուսնու առջև:
Տաթևիկ Պ.-ն քննչական բաժնում խոստովանական ցուցմունքներ է տվել:
Կատարվում է քննություն:
