Այսօր լրագրողների հետ հանդիպման ժամանակ Սպառողների ասոցիացիայի նախագահ Արմեն Պողոսյանը նշեց, որ, ընդհանուր համատարած թանկացումներով հանդերձ, կան սպառողական ապրանքներ, որոնք էժանացել են: «Ես մտել եմ մի քանի ցանցային առևտրի կետեր, ինձ ապացուցել են, որ որոշ ապրանքներ (օրինակ` հնդկահավը, զովացուցիչ ջրերը և այլն) էժանացել են: Ավելի վստահելի են այս ցանցային առևտրի խպանութները` կրպակների, փողոցային առևտրի համեմատ: Այնտեղ ապրանքները անվերահսկելի են և՛ գնի, և՛ որակի առումով: Իսկ փողոցային առևտուրը չարիք է, որը պետք է իսպառ բացառվի մեր երկրում: Փողոցային առևտրի հարցում սանիտարահիգիենիկ կառույցներն ու որակի տեսչությունը անելիք չունեն: Չունեն այն առումով, որ չկա սուբյեկտ, որի նկատմամբ պատժամիջոցներ հնարավոր լինի կիրառել: Այդ պատճառով էլ փողոցային առևտուրը արմատախիլ անելու հարցով պետք է զբաղվեն ներքին գործերի նախարարությունն ու տեղական ինքնակառավարման մարմինները»,- ասաց Ա. Պողոսյանը: