2009 թվականից ԵՊՀ-ում իրականացվում է եռամյա ծրագիր, որով համալսարանի բնագիտական թևի 6 ֆակուլտետների ուսումնական լաբորատորիաները համալրվել են ժամանակակից սարքավորումներով: Այս տարվա ծրագրով ձեռք բերված սարքավորումների գինը կազմում է 158 միլիոն դրամ, որից 58 միլիոն դրամը ծախսել է համալսարանը, իսկ 100 միլիոն դրամ ստացվել է Սերժ Սարգսյանի բարեգործական հիմնադրամից: Բացի այդ, ևս 65 հազար դոլարի սարքավորումներ էլ կոմպլեկտավորվում են ԱՄՆ-ում: Դրանք բոլորը ռադիոֆիզիկայի ֆակուլտետի սարքավորումներն են, որոնք գնվում են Հայ բարեգործական ընդհանուր միության՝ համալսարանին հասանելիք տոկոսների հաշվին: Մինչ այդ նորագույն սարքավորումների ձեռք բերումը ԵՊՀ սարքավորումները 60-ական թվականների արտադրության էին, չնայած տարիների ընթացքում նոր սարքավորումների համալրումներ եղել են, որոնք, սակայն, ամբողջական լաբորատորիաներ չեն ձևավորել: «Այս եռամյա ծրագրով ոչ միայն վերազինվում են հները, այլև ձևավորվում են նոր տիպի լաբորատորիաներ։ Արդյունքում կստեղծվի ԵՊՀ անհրաժեշտ ուսումնագիտական փորձարարական լաբորատորիա, որով մայր բուհը կդառնա առավել մրցունակ»,- նշեց ԵՊՀ ռեկտոր Արամ Սիմոնյանը: