Այսօր կարճատև աշխատանքային այցով Սյունիքի մարզ է այցելել Սերժ Սարգսյանը: Գորիսի սրտաբանական կլինիկայի բացման հանդիսավոր արարողությանը մասնակցելուց հետո նա կայցելի Կապան, կծանոթանա Գեղիի տարածքում գործող «Լեռ-էքս» ՍՊԸ-ի Հանքասարի պղնձամոլիբդենային հանքավայրի կենտրոնական տեղամասի աշխատանքներին: Ծովի մակերևույթից 2200-2600 մետր բարձրության վրա գտնվող հանքավայրը լրիվ հզորությամբ սկսել է աշխատել այս տարվա դեկտեմբերի 1-ից: Հանքավայրում այսօր աշխատում է 300 մարդ, բայց նախատեսված է հասցնել 500-ի։ Ուսումնասիրությունները պարզել են, որ բացի մոլիբդենից ու պղնձից` այստեղ նաև ռենիումի պաշար կա: Ըստ գործադիր տնօրեն Արմեն Բակունցի՝ տարեկան 150 հազար տոննա հանքաքար է արդյունահանվելու:
Նշենք, որ հանքավայրը ռազմավարական նշանակություն ունի: Այն ընդամենը 2 կմ է հեռու Նախիջևանից: Չի բացառվում, որ տարիներ հետո այստեղ նոր բնակավայր լինի: Հանքավայրը պատկանում է Սյունիքի մարզպետ Սուրիկ Խաչատրյանին: Ավելի ուշ լրագրողներին տեղեկացրին, որ վերջիններս նախագահի այցը կարող են լուսաբանել միայն Գորիսում: Գեղիի հանքավայր տեխնիկապես դժվար կլինի հասնել, քանի որ ճանապարհը երկար է ու ոչ բարվոք: Հանքավայր այցի մասին լրատվամիջոցներին համապատասխան լրատվություն կտրամադրի նախագահի լրատվականը: Նախագահի հերթական այցը Սյունիք որոշ փորձագետներ դժվարանում են մեկնաբանել: Ըստ երևույթին, Սյունիքի մարզպետը ցանկացել է Զանգեզուրի պղնձամոլիբդենային կոմբինատի գլխավոր տնօրեն Մաքսիմ Հակոբյանին ապացուցել, որ մարզպետը ուժեղ է: Նշենք, որ ԶՊՄԿ-ի տնօրենի ու Սյունիքի մարզպետի միջև հակասություն կա:
Շրջանառվում է նաև այն տարբերակը, որ Սյունիքի մարզպետը Ամանորի տոներից հետո նշանակվելու է Բնապահպանության նախարար: