Հենց նոր հայտնի դարձավ, որ Ազգային ժողովը երկրորդ ընթերցմամբ կողմ է քվեարկել «Լեզվի մասին» և «Հանրակրթության մասին» օրենքներում փոփոխություններ կատարելու նախագծին, որով Հայաստանում բացվելու են օտարալեզու դպրոցներ: Չնայած մի քանի ամսվա քննարկումներին, հասարակական ընդվզմանը, հասարակական-քաղաքական գործիչների, մտավորականների ելույթներին` այդուամենայնիվ, Ազգային ժողովի մեծամասնությունը կողմ քվեարկեց այդ օրինագծին:
Պարզ էր, որ Հանրապետական և Օրինաց երկիր կուսակցությունները կողմ են քվեարկելու այդ օրինագծին, և նրանց գործողությունների գնահատականը վաղուց տրված է` «ինչ կասեն, այն էլ կանեն», այդ թվում և ԱԺ նախագահ Հովիկ Աբրահամյանին, որը մի քանի ամիս առաջ խոստացել էր, որ «Լեզվի մասին» օրենքում փոփոխություններ չեն լինի, սակայն փոփոխություններն արդեն իրողություն են:
Սակայն կրկնակի դատապարտելի է Բարգավաճ Հայաստան կուսակցության պահվածքը, որն անցած շաբաթ, ինչ-ինչ քաղաքական շահերից ելնելով, տապալեց «Աղբահանության մասին» ՀՀ օրենքի ընդունումը, սակայն այսօր նույնը չարեց «Լեզվի մասին» օրենքի դեպքում: Ստացվում է այնպես, որ աղբը ԲՀԿ-ի համար ավելի կարևոր է, քան ՀԱՅՈՑ լեզուն և ազգային դպրոցը: