Ֆրանսիայի շուրթերով Եվրոպան ասաց. ո՛չ Թուրքիային: Այսօր լրագրողների հետ հանդիպմանը նման տեսակետ հայտնեց ԼՂՀ ԱԳ նախկին նախարար Արման Մելիքյանը`անդրադառնալով Ֆրանսիայի ԱԺ ընդունած` Ցեղասպանության ժխտումը քրեականացնող օրինագծին:
Անդրադառնալով տարածաշրջանային գործընթացներին` նա նշեց, որ ՌԴ Պետդումայի ընտրություններից հետո հստակեցվեց ԱՄՆ դիրքորոշումը. Ռուսաստանը չի կարող Արևմուտքի իրավահավասար գործընկերը լինել, քանի որ Պուտինը ժողովրդավար չէ, սակայն այստեղ խնդիրը ոչ այնքան ժողովրդավարության հետ է կապված, որքան շահերի: «Ռուսաստանը, լինելով Եվրամիության մաս, կարող է վտանգել ԱՄՆ շահերը: Այս ամենի շարունակությունն է Ֆրանսիայի ԱԺ կողմից ընդունված օրինագիծը»,- մեկնաբանեց Ա. Մելիքյանը:
ԼՂՀ ԱԳ նախկին նախարարը անդրադարձավ նաև Արաբական աշխարհում տեղի ունեցող գործընթացներին: Նա նշեց, որ այդ երկրներում տիրում էր ավտորիտար ռեժիմ, այսինքն` մեծ հաշվով նրանց ղեկավարները լեգիտիմ չէին: «Վերջերս տեղի ունեցավ Արաբական երկրների միապետների համաժողով, նրանք որոշեցին համախմբվել ընդդեմ ներկա մարտահրավերների: Մի կողմից` նրանց իշխանությունը տապալվում է, մյուս կողմից` նրանք որոշել են համախմբվել»,- ներկայացրեց Ա. Մելիքյանը:
Խոսելով Իրանի Իսլամական Հանրապետության հետ հարաբերությունների մասին` Ա. Մելիքյանը համոզված է. անկախ նրանից` իշխանության որ ձևը կընտրեն նրանք, Հայաստանը պետք է զարգացնի հարաբերությունները Իրանի հետ: Նրա կարծիքով` Իրանում ռազմական գործողություններ տեղի չեն ունենա: