«Այս թանկացումների, կեղծ, անհայտ ու կասկածելի ծագման ապրանքների հեղեղը Նոր տարվա շեմին ավելանում է»,- այսօր ասուլիսի ժամանակ այս մասին խոսեց Սպառողների ասոցիացիայի նախագահ Արմեն Պողոսյանը: Ըստ նրա՝ ձու արտադրող ձեռնարկությունների ներկայացուցիչները դեկտեմբերի 4-ին ասուլիսով խոստացել էին, որ ձվի գինը չեն թանկացնելու: «Ես այդ ժամանակ հրապարակայնորեն ասացի` հիշեք, դեկտեմբերի 27-ին կխոսենք: Այսօր դեռ դեկտեմբերի 22-ն է, սակայն ձվի գինը թռիչքային բարձացել է: Նմանապես` քաղցրավենիքը, միսը, բազմաթիվ այլ ապրանքներ անտրամաբանական ձևով թանկանում են»,- ասաց Ա. Պողոսյանը` հավելելով, որ այս տարվա նախատոնական թանկացումները էականորեն չեն տարբերվում նախորդ տարիների նախատոնական թանկացումներից: «Մեր երկրում, բոլոր վիճակագրական տվյալներով, բնակչության 12-20%-ը ապահով շերտն է, որի համար նշանակություն չունեն այս թանկացումները: Բայց մեզ հետաքրքրում է մնացած 80%-ը, որից էլ 50%-ը աղքատության շեմին են կամ աղքատության շեմից ներքև: Եվ մեր հորդորն այն է, որ վերահսկող պետական մարմիները ավելի անվրեպ գործեն, չի կարելի սա հանդուրժել, այդ թանկացնողները պետք է պատժվեն տուգանքի ձևով»,- ասաց Ա. Պողոսյանը: Նա որպես դրական երևույթ համարեց այն, որ ձվի մակնշման հարցը լուծված է: «Մեր երկրի խանութներում այլևս չկա չմակնշված ձու: Կար ժամանակ, որ մակնշված ձու կար միան մեր գրասենյակում` ինձ հատուկ ուղարկել էին, որ իբր թե պատշաճ են աշխատում»,- ասաց Ա. Պողոսյանը: