«Հենարան» ակումբի այսօրվա հյուրն էր ռազմական փորձագետ Դավիթ Ջամալյանը, որը խոսեց «2011-ի նշանակալից ռազմաքաղաքական իրադարձությունների ամփոփում. 2012-ի ակնկալիքներ» թեմայի շուրջ:
Նախ` նա առանձնացրեց Ադրբեջանին խաղաղություն պարտադրելու ջանքերը: «Ադրբեջանի ռազմական առավելությունը չեզոքացվեց,- նշեց Դավիթ Ջամալյանը:- Մենք առաջիկա մեկ-երկու տարիներին ունակ ենք խաղաղություն պարտադրել հակառակորդին»: Հնարավոր է` հակառակորդը շփման գծում սադրանքների դիմի. «Մեր խնդիրն է նվազեցնել հակառակորդի պրովոկացիաները»,- հայտնեց նա:
Դավիթ Ջամալյանը անդրադարձավ նաև բանակի ներքին խնդիրներին, տեղի ունեցած արտակարգ պատահարներին: Ի՞նչ պետք է արվի, որպեսզի կանխվեն այդ դեպքերը. «Մենք խնդիր ունենք եկող տարի բանակում ներդնել մշակված ցուցումները: Բանակի ողջ անձնակազմը պետք է գիտակցի, որ բռնությունը բանակում տեղ չունի: Հայ սպան պետք է զերծ լինի բռնությունից, իսկ անպատժելիությունը պետք է վերացնել: Մենք պետք է հետևողական լինենք, որ բանակի անձնակազմը առաջնորդվի այդ ցուցումներով»,- նշեց նա` ներկայացնելով մշակված ուղեցույցը:
Ռազմական փորձագետը նաև հավելեց, որ նախորդ տարիների համեմատ «բանակում դեպքերը նվազել են»:
«Հրապարակելով կատարված դեպքերը` ոչ թե թշնամու ջրաղացին ենք ջուր լցնում, այլ ավելի ենք ուժեղանում: Բայց անհրաժեշտ է գիտակցել, թե ինչպես ենք դրանք մատուցում… մի կողմից` պետք է ապահովենք հրապարակայնությունը, մյուս կողմից` չհարվածենք բանակի կերպարին»,- հայտարարեց Դավիթ Ջամալյանը: