Օրերս մամուլում տեղեկություններ հայտնվեցին այն մասին, որ Ռուսաստանում գործող «Միաբանություն» հիմնադրամի ղեկավար Սմբատ Կարախանյանը ակտիվ շփումների մեջ է հայաստանյան իշխանությունների հետ: Այս տեղեկության հրապարակումից անմիջապես հետո Կարախանյանը հարցազրույց տվեց «Ժողովուրդ» օրաթերթին, և պատասխանելով հարցին՝ արդյոք Պուտինը լոյա՞լ է վերաբերվում Հայ ազգային կոնգրեսին, պատասխանեց. «Ես չգիտեմ, թե Կոնգրեսի քաղաքական մարմինն ընտրություններից առաջ ինչ որոշումներ կընդունի, բայց այսօրվա դրությամբ կարող եմ ասել՝ մասամբ մասնակից լինելով բոլոր այդ հանդիպումներին և բանակցային պրոցեսներին, որ Կոնգրեսից հստակ մի բան Է ակնկալվում, որ տարվի հայամետ քաղաքականություն: Հարցը դրված չէ՝ ռուսամետ, այլ հայամետ: Հարցը դրվում է այսպես՝ մենք ինչ տեսակ Հայաստան ենք ուզում, որ արևմտյան կցորդ դառնա ու տարբեր ասոցացված միությունների միջոցով մտնի Թուրքիայի տա՞կ, արևմտյան ստրատեգները Հայաստանում ստեղծեն տրանզիտային արտաքին ռազմական հարթակնե՞ր: Հետո էլ վերջին պահին գան ռուսների գիրկն ու ասեն. «Մենք ձերն ենք՝ ոտքով գլխով, հոգով սրտով»:
«Նոր ժամանականեր» կուսակցության առաջնորդ Արամ Կարապետյանին «Առաջին լրատվականը» այսօր հարցրեց, թե որքանո՞վ կարելի է լուրջ ընդունել Կարախանյանին առհասարակ՝ որպես ազդեցիկ գործիչ Ռուսաստանի քաղաքական շրջանակներում. «Քանի որ ես ընդհանրապես չեմ ճանաչում նրան` որևէ բան ասել չեմ կարող, որևէ լրջություն կամ ոչ լրջություն ասել չեմ կարող»,- ասաց Արամ Կարապետյանը:
«Առաջին լրատվական»-ի դիտարկմանը, թե Կարախանյանի հարցացրույցով, ապա Լևոն Զուրաբյանի մամլո ասուլիսով ՀԱԿ-ի ռուսական կողմնորոշման փաստը այլևս կարելի է իրողություն համարել, հետևաբար՝ կարելի՞ է ենթադրել, որ «Նոր ժամանակները», որը համարվում է ռուսական կողմնորոշման ուժ, կարող է գործակցել Հայ ազգային կոնգրեսի հետ՝ առնվազն այդ տիրույթում:
«Մենք Կոնգրեսի՝ որպես համաժողովրական շարժման հետ միշտ էլ որոշակի համագործակցություն ունեցել ենք, ես մասնակից եմ եղել նրանց բոլոր գործողություններին: Բայց հիմա արդեն ընտրությունների շրջան է, ավելի շատ խնդիրը գնալու է գաղափարական հիմքի հետ կապված: Դրա համար մի բան է մոտ լինել ռուսական էլիտային, բայց մեկ բան է գաղափարական ընդհանրություններ ունենալը: Օրինակ՝ ես չգիտեմ՝ Կոնգրեսը ինչ վերաբերմունք ունի Եվրասիական միությանը, ինչ վերաբերմունք ունի արդյունաբերության զարգացմանը, տարածաշրջանային գործընթացների հետ կապված` հայ-թուրքական, հայ-վրացական հարաբերությունների հետ կապված և այլն: Այսինքն՝ երբ պարզ կդառնան պլատֆորմները` այն ժամանակ կարելի է ասել` նոր համագործակցություն կստացվի՞, թե ոչ»,- նշեց Արամ Կարապետյանը:
«Այսինքն` եթե ձեր նշած հարցադրումների վերաբերյալ Կոնգրեսը ձեր դիրքորոշմանը համահունչ դիրքորոշում արտահայտի` դուք չե՞ք բացառում նման համագործակցությունը». հարցրինք Արամ Կարապետյանին։ «Այդ պարագայում միանշանակ հասկանալի է, որ բոլոր ուժերն էլ սկսելու են իրար հետ համագործակցել: Այսինքն՝ եթե համահունչ ծրագրեր ունեն`ուրեմն պարզ է, որ համագործակցելու են: Մինչև հիմա մյուս ուժերը դեռ իրենց կարծիքները չեն հայտնել, իրականում այդքան էլ ժամանակ չի մնացել մինչև ընտրությունները, և հենց սկսեն իրենց դիրքորոշումները արտահայտել, իրենց նախընտրական որոշակի ծրագրային զարգացումները ներկայացնել` ռեալ քննարկումներ կծավալվեն»,- նկատեց «Նոր ժամանակներ» կուսակցության առաջնորդը: