«Հայաստան» համահայկական հիմնադրամի մոսկովյան ամենամյա ճաշկերույթը, որ տեղի էր ունենում 2008 թվականից, այսինքն` Սերժ Սարգսյանի նախագահությունից սկսած, այս տարի անցել է առանց Սերժ Սարգսյանի, միայն ԼՂՀ նախագահ Բակո Սահակյանի մասնակցությամբ: Սերժ Սարգսյանի մամլո քարտուղար Արմեն Արզումանյանը հայտարարել է, որ Սարգսյանը ճաշկերույթներին մասնակցում էր դրանք խրախուսելու նպատակով, ինչից թերևս մնում է ենթադրել, որ այժմ այդ խրախուսանքի կարիքը չկա: Սակայն, դատելով նրանից, որ այս տարի ճաշկերույթը կարծես թե բավականին անաղմուկ է անցնում, պետք է եզրակացնել, որ այն, ըստ էության, կայացած միջոցառում չէ, և Սերժ Սարգսյանը բավական վաղ է հրաժարվել միջոցառումը խրախուսելուց: Այսինքն` Սարգսյանը կամ սխալվել է, կամ էլ պարզապես այդ միջոցառումը նրա համար դադարել է հետաքրքիր լինել:
Սակայն կա նաև երրորդ տարբերակը՝ միջոցառումը դադարել է հետաքրքիր լինել, այսպես ասած, ռուսաստանահայ բիզնեսմենների համար, որոնք կազմում էին այդ ճաշկերույթի առանցքը և ապահովում հանգանակությունների բյուջեն իրենց հատկացումներով: Իսկ եթե բիզնեսմենների համար ճաշկերույթը դառնում է անհետաքրքիր, ապա Սերժ Սարգսյանին մնում է ընդամենը չմասնակցել դրան, այսպես ասած` միայնակ չմնալու համար: Իսկ որ ռուսաստանահայ բիզնեսմենների համար ճաշկերույթը դառնում է անհետաքրքիր, թերևս վկայում է, օրինակ, այն հանգամանքը, որ Ռուսաստանի, այսպես ասած, թիվ մեկ շրջանառություն ունեցող հայ բիզնեսմեններից մեկը Արամ Աբրահամյանը, այս օրերին Մոսկվայից մեկնել էր ԱՄՆ և վերադառնալու էր տոներից հետո միայն: Այսինքն` սա ինքնին ցուցիչ է, որ ճաշկերույթի կալիբրը էականորեն նվազում է, և դրա համար էլ Սերժ Սարգսյանը չի մասնակցում դրան:
Իսկ թե ինչու են ռուսաստանահայ խոշոր գործարարները դադարել հետաքրքրություն ցուցաբերել այդ միջոցառման հանդեպ, երևի թե մնում է միայն գուշակել: Դրա պատճառները կարող են լինել և քաղաքական, և պարզապես կապված լինել այն բանի հետ, որ բիզնեսմենները դժգոհ են իրենց հանգանակությունների տնօրինման արդյունավետությունից: Ընդհանուր առմամբ, սա իսկապես ծավալուն վերլուծության թեմա է, որին իհարկե մենք կանդրադառնանք առաջիկայում, առայժմ ընդամենը փաստելով, որ ճաշկերույթի դերակատարության նվազումը իսկապես վկայում է թե՛ Հայաստանի ներքաղաքական և թե՛ հայ-ռուսական տիրույթում տեղի ունեցող հետաքրքրական գործընթացների մասին: