ՌԴ վարչապետ Վլադիմիր Պուտինը հանդիպում է ունեցել ֆուտբոլային թիմերի և երկրպագուական խմբերի ներկայացուցիչների հետ: Այդ հանդիպմանը ներկա են գտնվել նաև Հյուսիսային Կովկասի ներկայացուցիչները: Այս մասին հաղորդում է RBC-ն:
Պուտինը հայտարարել է, որ «Սպարտակի» երկրպագուի սպանությունը ողբերգություն է, և ֆանատներին կոչ է արել չընկնել ծայրահեղականների ազդեցության տակ: «Երկրպագուների կազմակերպությունները միշտ աչքի են ընկել իրենց անկախությամբ, սակայն վերջին ժամանակներում նրանց մեջ են փորձում ներթափանցել ծայրահեղականները»,- ասել է ՌԴ վարչապետը: Նա հույս է հայտնել, որ երկրպագուները չեն ընկնի ազդեցության տակ և չեն օգտագործվի ուրիշների կողմից` այլ նպատակների համար:
Նա չի բացառել, որ եթե եկվորները շարունակեն խախտել տեղի օրենքները և ավանդույթները, ապա մեծ քաղաքների գրանցման կարգը կարող է և փոփոխվել:
Նա նշել է նաև, որ Ռուսաստանի ուժն իր բազմազգ լինելու մեջ է: «Բայց եթե մենք չհասկանանք, թե այդ ուժի հետ ինչպես վարվենք, եթե մենք սրով ընկնենք մեկս մյուսի հետևից, ապա կքանդենք այն»,- ասել է վարչապետը:
Այնուհետև նա երկրպագուների հետ ավտոբուսով մեկնել է գերեզմանատուն, որտեղ թաղված է «Սպարտակի» երկրպագուն և ծաղիկներ դրել այնտեղ:
Այն, որ միջէթնիկ իրավիճակը Ռուսաստանում շատ լուրջ է, դա արդեն հասկանալի է հենց Պուտինի այս քայլից:
Հիշեցնենք նաև, որ դեկտեմբերի 6-ին «Սպարտակի» երկրպագուի սպանությունից հետո Մոսկվայում և ՌԴ այլ քաղաքներում ազգայնականների կողմից հրահրվեցին բախումներ, որի արդյունքում եղան զոհեր և վիրավորներ:
