Խոսքի ազատության պաշտպանության կոմիտեի նախագահ Աշոտ Մելիքյանը մամուլի ասուլիսի ժամանակ նշեց, որ կոմիտեի ստեղծած աշխատանքային խմբում ընդգրկված են ինքը, փորձագետ Մեսրոպ Հարությունյանը, իրավաբան Օլգա Սաֆարյանը, տեխնիկական գիտությունների թեկնածու, դոցենտ Մարտին Այվազյանը, և «Լրագրողներ հանուն ապագայի» ՀԿ նախագահ Սուրեն Դեհերյանը: Խմբի առաջարկությունները վերաբերում են հեռուստատեսության և ռադիոյի հեռարձակման ոլորտը կարգավորող փոփոխություններին, տեխնիկական հնարավորություններին, հասարակության հետ իրականացվող աշխատանքներին: «Զարգացած երկրներում պետությունը շատ ակտիվ քայլեր է կատարում, որպեսզի ձեռք բերվի հանրային համաձայնություն և հանրային համաձայնության մթնոլորտում տեղի ունենա գործընթացը»,- ասաց Աշոտ Մելիքյանը: Նա լրագրողներին տեղեկացրեց, որ ուսումնասիրել են նախկին խորհրդային երկրներից Էստոնիայի փորձը: Աշոտ Մելիքյանն ասաց, որ հեռարձակման ոլորտն անհրաժեշտ է ազատականացնել, քանի որ այդ ուղիով է գնում ողջ քաղաքակիրթ աշխարհը: Լիցենզավորման մրցույթներն անհրաժեշտ են, քանի որ, ըստ Ա. Մելիքյանի, զարգանում են ինտերնետային հեռարձակումը, արբանյակային հեռարձակումը, կաբելային հեռարձակման ձևը: Մեսրոպ Հարությունյանն էլ նշեց, որ փոփոխությունները միտված են պարզ լիցենզավորման գաղափարը կյանքի կոչելուն: «Տեխնոլոգիական զարգացումների պարագայում, երբ դեռ չգիտենք` արդյոք անցումը թվայնացմանն այն է, ինչին մենք ձգտում ենք, հարկ է, որ նրանք, ովքեր ուզում են իրականացնել հեռարձակում, ոչ թե պետք է ինչ-որ լիցենզավորման մրցույթների մասնակցեն ինչ-որ կապուղիներով հեռարձակելու համար, այլ` պարզ ընթացակարգով, ինչպես սահմանված է ՀՀ «Լիցենզավորման մասին» օրենքով, ստանում են լիցենզիա և հետո որոշում հեռարձակման ձևը»,- ասաց Մեսրոպ Հարությունյանը: Նա նշեց, որ փոփոխություններով պետք է տուրք գանձվի լիցենզիայի համար: Առաջարկվող փոփոխություններով մրցույթներ նախատեսված են միայն պետական շահագործման կապուղիներով հեռարձակվելու համար: Մեսրոպ Հարությունյանն ուշադրություն հրավիրեց այն փոփոխությունների վրա, համաձայն որոնց` մրցութային հանձնաժողովը, որը տրամադրում է լիցենզիաներ, կազմակերպելու է հասարակական լսումներ և հաշվի է առնում հասարակական կարծիքը: