Ինչպես տեղեկացրել էինք՝ դեկտեմբերի 17-ին` ժամը 10.50-ին, Արագածոտնի մարզի Օրգով գյուղի մի բնակչից ոստիկանության Աշտարակի բաժնում ահազանգ էր ստացվել, որ ժամը 08.00-ի սահմաններում իր տան բակում կայանված ծառայողական «ԳԱԶ 3110» մակնիշի ավտոմեքենայի շարժիչի կափարիչի վրա կասկածելի սարք է հայտնաբերել:
Դեպքի վայր մեկնած ոստիկանության կազմակերպված հանցավորության դեմ պայքարի գլխավոր վարչության, Արագածոտնի մարզային վարչության, Աշտարակի բաժնի, ԱԱԾ և ԱԻՆ փրկարար ծառայության աշխատակիցներ պարզել էին, որ հայտնաբերվածը պայթուցիկ սարք է, որը վնասազերծվել էր և ուղարկվել պայթյունատեխնիկական փորձաքննության:
Հաջորդ օրը ոստիկանության Աշտարակի բաժին բերման ենթարկվեց Արագածոտնի մարզի Օրգով գյուղի բնակիչ, 30-ամյա Սևակ Հովհաննիսյանը: Նա խոստովանական ցուցմունք տվեց, որ ինքն է տեղադրել ինքնաշեն պայթուցիկ սարքը՝ համագյուղացուն սպանելու նպատակով:
Փաստի առթիվ հարուցվել է քրեական գործ ՀՀ քրեական օրենսգրքի 34-104-րդ հոդվածի 2-րդ մասի 6-րդ կետով, այն է` սպանության փորձ, որը կատարվել է շատերի կյանքի համար վտանգավոր եղանակով, և 235-րդ հոդվածի 1-ին մասով:
Սևակ Հովհաննիսյանը ձերբակալված է:
