«Առաջին լրատվականին» հայտնի է դարձել, որ երեկ քրեական աշխարհում ամենահայտնի «օրենքով գողերից» մեկի` Արմեն Կանևսկոյի հոգեհանգստյան արարողությանը` ուշ երեկոյան, մասնակցել են երեք հայ բարձրաստիճան զինվորականներ` ՀՀ Պաշտպանության նախարարի առաջին տեղակալ Վլադիմիր Գասպարյանը, գեներալ Հայկազ Բաղմանյանը եւ ՀՀ ԶՈւ Գլխավոր շտաբի պետի տեղակալ Արշալույս Փայտյանը։
Հիշեցնենք, որ այսօր Երևանի Շահումյանի գերեզմանատանը տեղի է ունեցել քրեական աշխարհում ամենահայտնի «օրենքով գողերից» մեկի` Արմեն Կանևսկոյի հուղարկավորությունը։ Երեկ մեզ հաջողվեց պարզել, որ չնայած հետխորհրդային տարածքի հանցագործ աշխարհի շատ ներկայացուցիչների արգելվել է ժամանել Հայաստան, սակայն Կանևսկոյի թաղման կարգին Ռուսաստանից կարողացել է ներկա գտնվել այդ երկրի քրեական աշխարհի ամենաազդեցիկ «օրենքով գող» Դեդ Հասանի թոռը։
Հիշեցնենք, որ կիրակի օրը Ռուսաստանի Աստրախան քաղաքի դատապարտյալների հիվանդանոցից Երևան էր տեղափոխվել Արմեն Կանևսկոյի դին։ Արմեն Կանևսկոյը (Արմեն Հարությունյան) 2009 թվականին դատապարտվել էր 11 տարվա ազատազրկման և շաքարախտով հիվանդ լինելու պատճառով պահվում էր դատապարտյալների հիվանդանոցում:
Արմեն Հարությունյանը ծնվել է Երևանում 1970 թ.: 1997 թ. նա «օրենքով գողե է կարգվել, իսկ այդ «պատվավոր» կոչումը նրան տվել է Դեդ Հասանը: Շատերը խոսում էին, որ նա կոչումի համար Դեդ Հասանին հսկայական գումարներ է տվել: Սկզբում Ա. Հարությունյանը, տեղափոխվելով Հայաստանից, գրանցվել է Կրասնոդարի մարզի Կանևսկոյ շրջանում, որտեղից էլ ստացել է իր անունը: Նա «նայել է» Կրասնոդարի գյուղատնտեսական շատ շրջաններ` հետևելով, որպեսզի այստեղի գյուղատնտեսական հայտնի կազմակերպությունները ժամանակին գումարներ փոխանցեն «գողական բյուջե»: Այնուհետև սկսել է զբաղվել նավթային բիզնեսով՝ չմոռանալով քրեական բիզնեսի մյուս ոլորտները` դրամաշորթում, մարդկանց առևանգում, զենքի առևտուր, ֆինանսական տարբեր խարդախություններ: Նրա ազդեցությունը հետզհետե սկսել է տարածվել Ռուսաստանի ողջ հարավում: Նա մի քանի անգամ դատված է եղել: