Կեղծ փարիսեցիություն է, երբ ոմանք ասում են, թե Լյուստրացիայի մասին օրինագծի ընդունմամբ ինքնամաքրման կգնայինք: Այսօր կայացած մամուլի ասուլիսին նման տեսակետ հայտնեց գրականագետ Վարդան Դևրիկյանը:
Նրա կարծիքով` նման օրինագծի ընդունումը կվնասի ոչ այնքան գաղտնազերծված գործակալներին, որքան նրանց ընտանիքի անդամներին, որոնք պիտակներից և որակումներից խուսափելու համար կգերադասեն հեռանալ Հայաստանից: «Փաստորեն նման օրինագծի ընդունումը կնպաստեր արտագաղթին»,- ասաց Դևրիկյանը:
Ասուլիսի մյուս բանախոս` Հայաստանի Ազգային արխիվի տնօրեն Ամատունի Վիրաբյանն էլ իր հերթին նկատեց, որ օրինագիծը ներկայացնողները գաղափար չունեն՝ ինչի մասին են խոսում:
«Նրանց անունները, ում ուզում են բացահայտել, վաղուց այլևս գոյություն չունեն: Այդ գործակալների անձնական գործերը ոչնչացվել են դեռևս խորհրդային տարիներին: Ընդհանուր առմամբ ողջունելի է, որ կառավարությունը մերժել է «Ժառանգություն» կուսակցության այդ նախաձեռնությունը»,- ամփոփեց նա:
Նշենք, որ կառավարությունն այսօրվա իր նիստին բացասական եզրակացություն է տվել ԱԺ «Ժառանգություն» խմբակցության հեղինակած «Լյուստրացիայի մասին» օրենքի նախագծին: Գործադիրը հանգել է այն եզրակացության, որ խնդիրն արդիական չէ։
Նշենք նաև, որ ԱԺ «Ժառանգություն» խմբակցությունն օրենսդրական առաջարկություն է ներկայացրել` Հայաստանում գաղտնազերծում (լյուստրացիա) անցկացնելու մասին: Ներկայացված փաթեթով առաջարկվում է իրավական սահմանում տալ լյուստրացիային` ամրագրելով այդ գործընթացի հաջորդականությունը:
Օրենսդրական նախաձեռնության նպատակներն են. գաղտնազերծել մինչև 1991թ. սեպտեմբերի 21-ի Հայաստանի անկախության հանրաքվեն նախկին ԽՍՀՄ Պետական անվտանգության կոմիտեի, հետախուզական, հակահետախուզական, օպերատիվ-հետախուզական գործունեություն իրականացնող մարմինների կամ այլ երկրների հատուկ ծառայությունների հետ բացահայտ կամ գաղտնի հիմունքներով աշխատած կամ համագործակցած անձանց:
