Կառավարության հինգշաբթի օրվա նիստում քննարկվելու է մի որոշման նախագիծ, որով թույլատրվել ու է Երևանի Վ.Բրյուսովի անվան պետական լեզվաբանական համալսարանին իրեն պատկանող (անհատույց և անժամկետ օգտագործման իրավունքով) Թումանյան 42 հասցեում գտնվող նկուղային և կիսանկուղային տարածքները մինչև 30 տարի ժամկետով հանձնել վարձակալության: Դրա անհրաժեշտությունը, ըստ նախագծի հիմնավորման, պայմանավորված է «հասարակության, համալսարանի, նրա ուսանողների և աշխատակիցների շահերով»: «Նշված տարածքները ուսումնական նպատակների, ինչպես նաև համալսարանի կողմից իրականացվող այլ գործառույթների համար պիտանի չեն, քանի որ նկուղային են և չեն համապատասխանում նման գործունեությամբ զբաղվելու համար նախատեսված տարածքներին ներկայացվող նորմատիվային պահանջներին: Նշված տարածքները պահանջում են հիմնանորոգում և վերանորոգում, ինչը կապված է ֆինանասական մեծ ծախսերի հետ: Համալսարանը բազմաթիվ անգամներ առաջարկներ է ստացել այդ տարածքները վարձակալությամբ հանձնելու, սակայն հնարավոր վարձակալները պայմանագրի ժամկետն մեկ տարով սահմանափակված լինելու պատճառով չեն ցանկացել ներդրումներ կատարել»,- ասված է հիմնավորման մեջ: Ըստ այդմ վարձակալությամբ հանձնվող տարածքներում նախատեսվում է կազմակերպել ինտերնետի ծառայություններ և գրադարան սրճարան: «Քաղաքացիները, ուսանողները ու աշխատողները հնարավորություն կունենան անցկացնելու իրենց ազատ ժամանակը, համատեղելով գիտության, գրականության, արվեստի և կրթության նորագույն նվաճումներին ծանոթանալու հնարավորության հետ: «Գաուդեամուս» ՍՊ ընկերությունը պատրաստ է նշված տարածքներում կատարել հիմնանորոգում (ներքին կառուցվածքի, հատակի, պատերի հիմնանորոգման և նորոգման աշխատանքների իրականացում, ինչպես նաև ջրագծերի, էլեկտրաէներգիայի այլ ենթակառուցվածքների ստեղծում իր միջոցների հաշվին, առանց հետագա փոխհատուցման հնարավորության), ընկերությունը տեղեկացված է նաև որ վարձակալությամբ հանձնվող տարածքներում նմանատիպ այլ գործունեություն կազմակերպելուց առաջ այն նախապես պետք է համաձայնեցվի համալսարանի հետ»,- նշված է հիմնավորման մեջ:
