Ինչպես այսօր գրում է The New York Times թերթը, ամերիկյան զինվորական ղեկավարությունը նախապատրաստել է մի փաստաթուղթ, որով պատրաստվում է ռազմական գործողություններ սկսել Պակիստանի տարածքում: Ըստ թերթի` այդ գործողությունները լինելու են տեղի փուշտունական ցեղերի դեմ` երկրի հյուսիս-արևմուտքում: Փաստորեն, սրանով ամերիկյան իշխանությունները նոր ճակատ կբացեն աֆղանական պատերազմում: Սակայն նաև հայտնի է, որ այս փաստաթուղթը պետք է ստանա նաև ԱՄՆ նախագահի աջակցությունը:
ԱՄՆ անօդաչու օդանավերը շուտվանից են պայքար մղում Պակիստանի տարածքի վերոնշյալ շրջաններում, քանի որ հաճախ աֆղանական տարածք գրոհայինները ներթափանցում են Պակիստանի հյուսիս-արևմուտքից:
Հաճախ այս հարվածները հարուցել են պակիստանյան իշխանությունների դժգոհությունը, քանի որ այդ հարվածների ժամանակ երբեմն նաև զոհվում էին խաղաղ բնակիչներ, այդ թվում նաև` երեխաներ:
Վերջերս ԱՄՆ անօդաչու ինքնաթիռների հարվածներից մահացել է 250 մարդ, որի արդյունքում պակիստանյան իշխանությունները մերժել են ամերիկյան զինվորականներին թույլ տալ մեծացնել ռազմական գործողությունների տարածքը: Փորձագետները նշում են, որ հենց այդ պատճառով է, որ ամերիկացիները որոշել են մշակել ցամաքային գործողությունների նոր պլան:
Այն, որ ամերիկյան զորքերը կարող են ռազմական գործողություններ սկսել Պակիստանի տարածքում, անուղղակիորեն նշել է ԱՄՆ փոխնախագահ Ջո Բայդենը, որի կարծիքով, Ալ-Ղաիդայի վերջնական ջախջախումը պետք է լինի Պակիստանի տարածքում: Բացի այդ, Օբաման հաճախ է մեղադրում պակիստանյան իշխանություններին` ահաբեկիչների դեմ ոչ լիարժեք պայքար մղելու պատճառով: